«Лаві хвалю»
Кампутарны мульт дасьціпна зьняты, як спартовая тэлевізійная перадача. Зоркі спорту - пінгвіны, пеўні, кальмары і марскія вожыкі.
Лаві хвалю (Surf's Up)
ЗША, 2007, каляровы, 85 хв.
Рэжысэры: Эш Брэнан, Крыс Бак
Жанр: Анімацыйная камэдыя
Адзнака: 6 (з 10)
Пінгвіня Кодзі марыць стаць слынным сэрфінгістам, як найлепшы сэрфэр усіх часоў Вялікі Зі. І героя адбіраюць на кубак памяці Вялікага Зі. Недарэка Кодзі навучыцца перамагаць, але й зразумее, што сяброўства важнейшае за любыя прызы…
Анімацыйная камэдыя для сямейнага прагляду створаная… як спартовы рэпартаж з закадравымі пытаньнямі, лёгкай камэрай і подпісамі: “Марскі вожык Іван, пінгвіня Кодзі, чэмапіён сьвету па сэрфінгу Танк”. Кампутарныя жывёлкі даюць інтэрвію (!), глыбокадумна закатываюць вочы (!!), а ў подпісах пазначаюцца пінгвіновыя тытулы (!!!)…
У “дакумэнтальным” спартовым рэпартажы зьдзіўляе неверагодная прамалёўка дэталяў: марскія хвалі выглядаюць сапраўднымі, камэра дрыгаецца, “жывёльная” хроніка быццам узятая з тэлевізіі.
Грымасы птушак, кальмараў, зьвяроў – пацешныя й жывыя. А гіпушны ёлупень Цыпа Джо – блазенская зорка экрану: разьдзяўбайская пеўневая фізія, прыгоды з туземцамі і мэлянхалічныя фразачкі. Але кожны пэрсанаж стужкі – ад галоўнага героя да другапляннага пінгвіняці мае свой непаўторны характар.
Жывая рэпартажная анімацыя – добры адпачынак для ўсёй сям’і.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам27
Каментары