19 listapada ŭ Minsku adbudziecca pieršaja sustreča śpiecyjalnaha pradstaŭnika premjer-ministra Hruzii pa suviaziach z Rasijaj Hieorhija Zurabašvili i namieśnika ministra zamiežnych spraŭ Rasii Michaiła Hałuzina, paviedamiŭ urad Hruzii.

Jak paviedamlajecca ŭ zajavie hruzinskaha ŭrada, baki płanujuć abmierkavać pašyreńnie handlu, pavieličeńnie turystyčnaha abmienu pamiž dźviuma krainami, a taksama raźvićcio kulturnych suviaziaŭ.
Pra pryznačeńnie Hieorhija Zurabašvili, jaki ŭ 2024—2025 hadach zajmaŭ pasadu namieśnika ministra zamiežnych spraŭ Hruzii, śpiecyjalnym pradstaŭnikom premjer-ministra Hruzii pa suviaziach z Rasijaj, stała viadoma ŭ kancy kastryčnika. Siarod hałoŭnych zadač novaha śpiecpradstaŭnika — mirnaje ŭrehulavańnie kanfliktu z Rasijaj, zachavańnie i raźvićcio isnych handlova-ekanamičnych suviaziaŭ, a taksama pastajanny dyjałoh pa humanitarnych pytańniach.
Pry hetym dypłamatyčnyja adnosiny pamiž Hruzijaj i Rasijaj paśla 2008 hoda, kali Rasija ździejśniła suprać Hruzii akt ahresii, a paśla aficyjna pryznała niezaležnaść Abchazii i Paŭdniovaj Asiecii, adsutničajuć.
Ciapier hruzinskija ŭłady, u apošnija hady faktyčna admoviŭšysia ad idei jeŭraintehracyi, sprabujuć adnavić adnosiny z Rasijaj. Ale dla partyi «Hruzinskaja mara», jakaja niaźmienna kiruje Hruzijaj z 2012 hoda, było b udaram pa reputacyi, kab adpaviednyja pieramovy adbyvalisia ŭ Rasii. Tamu i ŭźnik varyjant Biełarusi jak «niejtralnaj» placoŭki.
Kamientary