Сітуацыя з пастаўкамі ў Расію малочнай прадукцыі з Беларусі абмяркоўвалася 6 лютага ў расійскім урадзе на селектарнай нарадзе па развіцці сельскай гаспадаркі.
Віцэ-прэм'ер РФ Аркадзь Дварковіч прапанаваў ініцыяваць антыдэмпінгавае расследаванне на рынку малочнай прадукцыі ў дачыненні да краін Еўропы і Беларусі.
«Мы павінны будзем у хуткім часе ў дачыненні да малочнай прадукцыі ініцыяваць антыдэмпінгавае расследаванне ў дачыненні, перш за ўсё, да еўрапейскіх краін: субсідыі там звышвысокія, і гэта ўжо наносіць урон нашай галіне. Але праблемы і з Беларуссю».
Кіраўнік урада Дзмітрый Мядзведзеў у адказ заявіў, што Расіі «трэба навучыцца карыстацца ўсім гэтым арсеналам». «Трэба актыўную пазіцыю займаць.
Што да Беларусі, сітуацыя павінна быць празрыстая і сіметрычная, таму што ў нас з імі практычна агульны рынак, адзіная мытная прастора, але калі сюды прыходзяць беларускія вытворцы, то і мы павінны мець магчымасць туды прыходзіць», — сказаў Мядзведзеў.
Як паведамлялася раней, Аркадзь Дварковіч, выступаючы 5 лютага на з'ездзе Нацыянальнага саюза вытворцаў малака ў Маскве, заявіў, што Расія можа ўвесці пэўныя меры ў дачыненні да беларускай малочнай прадукцыі для абароны рынку ад нядобрасумленнай канкурэнцыі. Пры гэтым ён зазначыў: меры будуць скіраваныя або наўпрост на малочную прадукцыю, або па іншых кірунках супрацоўніцтва.
Варта зазначыць, што мінулай восенню Расспажыўнагляд і Рассельгаснагляд заяўлялі аб прэтэнзіях да якасці беларускай малочнай прадукцыі.
Каментары