Біёлагі знайшлі «добра схаваную» сувязь між мозгам і імуннай сістэмай
Цяпер ёсць шанец перамагчы аўтызм, рассеяны склероз і хваробу Альцгеймера.
Даследчыкі ўніверсітэта сістэмы аховы здароўя Вірджыніі, ЗША, знайшлі прамую сувязь між мозгам і імуннай сістэмай: лімфатычныя сасуды ідуць наўпрост у мозг, піша Neuroscience News са спасылкай на даследаванне, што будзе хутка апублікаванае ў часопісе Nature.
Раней было незразумела, як лімфатычная сістэма ўзаемадзейнічае з мозгам. З адкрыццём лімфатычных сасудаў у мозгу прыйдзецца перапісваць падручнікі анатоміі.
Выявілася, што яе сасуды тысячы год «хаваліся» ад даследчыкаў чалавечага цела ў мозгавай абалонцы побач з крывяноснымі сасудамі. Гэта заўважыў прафесар Антуан Луво, калі даследаваў цвёрдую мозгавую абалонку мышы і прыдумаў спосаб ускрыцця, пры якім гэтая абалонка застаецца цэлай.
Навукоўцы кажуць аб сваім здзіўленні адкрыццю: методыка была не такой складанай — дзіўна, што столькі разнастайных даследаванняў (у тым ліку магнітна-рэзанансная тамаграфія) не паказалі навукоўцам сасуды лімфатычнай сістэмы.
Лімфатычная сістэма выконвае важную ролю ў абмене рэчываў, ачыстцы тканак і клетак арганізму, а таксама ў рабоце імуннай сістэмы. Той факт, што менавіта яна ўзаемадзейнічае з галаўным мозгам, можа даць адказы на многія пытанні.
У прыватнасці, далейшыя даследаванні могуць паказаць шляхі лекавання хваробы Альцгеймера (магчыма, яе прычынамі ёсць якраз «непаладкі» лімфатычнай сістэмы), а таксама рассеянага склерозу і нават аўтызму.
Каментары