Аргкамітэт па святкаванні 101-годдзя Беларускай Народнай Рэспублікі падаў заяўку на правядзенне Дня Волі — 2019, паведаміў у сваім тэлеграме 1863x.
Арганізатары прапануюць шэсце ад вул. Кастрычніцкай да стадыёна «Дынама» з мітынгам і канцэртам.
Нагадаем, што роўна 30 гадоў таму, 19 лютага 1989 года, БНФ правёў на «Дынама» мітынг пад бел-чырвона-белым сцягам і «Пагоняй», мітынг сабраў каля 40 000 чалавек.
Падачу заяўкі «Нашай Ніве» пракаментаваў лідар партыі БНФ Рыгор Кастусёў.
«Заяўка пададзена ад юрыдычных асоб: БНФ і культурніцка-асветніцкай установы «Амарока», — сказаў ён. — Дата мерапрыемства — нядзеля, 24 сакавіка».
Мы заўважылі, што такі сцэнар падаецца даволі амбітным. Як Кастусёў ацэньвае шансы на поспех?
«Такія развагі недарэчныя. Летась таксама не было пэўнасці, ці атрымаецца ў нас правесці канцэрт ля Опернага. І цяпер, як і тады, ёсць жаданне, спадзеў, але і рызыка. Ёсць папярэднія дамоўленасці з «Дынама» аб канцэрце, але для іх канчатковасці патрэбны дазвол. Мы чакаем яго цягам месяца і заклікаем усе партыі, палітычныя і культурніцкія арганізацыі падтрымаць нашую ініцыятыву і зрабіць усё, каб годна адсвяткаваць угодкі абвяшчэння незалежнасці Беларускай Народнай Рэспублікі», — падсумаваў Кастусёў.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары