У Карэліцкім раёне сабак гадавалі на продаж у канцлагерных умовах
У Карэліцкім раёне ўзнік скандал з гадавальнікам у вёсцы Барацін, у якім у жудасных умовах жылі сабакі. Тут разводзілі элітныя сабачыя пароды — балонкі, шпіцы, мальтыйскія балонкі, кітайскія чубатыя, бультэр'еры, лабрадоры і іншыя. Але жыццё ў іх было як у канцлагеры.
Гадавальнік працаваў шмат гадоў, а пра ўмовы, у якіх знаходзіліся жывёлы, доўга нічога не было вядома. Але ў пачатку лютага валанцёры высветлілі, што жывёлы ўтрымліваюцца ў зусім непрыдатных умовах і забілі трывогу.
Падставай для таго, каб занепакоіцца, стала пакупка адной дзяўчынай з гэтага гадавальніка сабакі, які знаходзіўся ў жахлівым стане. Яна апублікавала пра гэта інфармацыю ў сацсетках, і пасля таго хваля стала накатваць, сведчанняў рабілася ўсё больш.
На відэа, якія публікаваліся ў сацсетках, было бачна, што сабакі жылі ў хлявах і вясковых хатах, клеткі стаялі адна на другой, а лабрадораў трымалі проста на вуліцы на кароткім ланцугу.
Мясцовыя жыхары расказалі, што знаходзіцца побач з гэтым месцам было і страшна, і балюча. Сабакі пастаянна брахалі, многія былі агрэсіўныя, вечна галодныя, бо ўладальніца гадавальніка часта з'язджала.
Пасля таго, як інфармацыя пра гадавальнік стала здабыткам публічнасці, пытаннем заняліся супрацоўнікі міліцыі і пракуратуры.
З гадавальніка вывезлі 114 жывёл, цяпер яны на ператрымках у валанцёраў. Астатніх уладальнікі паспелі вывезці ў невядомым кірунку.
Тыя, якія патрапілі да валанцёраў, як гаворыцца ў сюжэце АНТ, «просяцца на рукі і літаральна млеюць ад чалавечай пяшчоты, якой ніколі не бачылі». Іх агледзелі ветэрынары, зрабілі аналізы і УГД. Палова сабак — з пашкоджаннямі зроку, некаторыя практычна сляпыя. Ёсць і фізічныя траўмы, шмат скурных хвароб, процьма паразітаў. Многія валанцёры, калі расказваюць пра тое, што яны бачылі ў гадавальніку і ў якім стане цяпер ужо іх гадаванцы, не стрымліваюць слёз.
На жаль, пакуль па гэтай справе не адбудзецца суд, новых гаспадароў сабакі знайсці не могуць. Але прынамсі цяпер яны ў добрых умовах і з людскім стаўленнем.
Глядзіце таксама:
«Пад'ехаў смеццявоз, і проста як смецце закінулі». У Жыткавічах знялі бязлітасную расправу з бадзяжнымі сабакамі
У Пружанскім раёне вясковага жыхара пакаралі за жорсткае абыходжанне з жывёламі
Цяпер чытаюць
Арыштавалі прадстаўнікоў кампаніі Bayer у Беларусі14
Каментары