Магутны землятрус у Турцыі і Сірыі: сотні загінулых, абрынуліся будынкі
Магутны землятрус адбыўся на паўднёвым усходзе Турцыі, недалёка ад мяжы з Сірыяй. У Турцыі абвешчана надзвычайнае становішча, піша Бі-бі-сі.
Геалагічная служба ЗША паведаміла, што землятрус магнітудай 7,8 адбыўся ў 04:17 па мясцовым часе на глыбіні 17,9 км, паблізу горада Газіянтэпа.
Некалькі будынкаў абрынуліся, пад заваламі шукаюць тых, хто выжыў.
Міністр унутраных спраў Турцыі Сулейман Салу паведаміў, што пацярпелі 10 гарадоў: Газіянтэп, Кахраманмараш, Хатай, Асманіе, Адыяман, Малатыя, Шанлыурфа, Адана, Дыярбакыр і Кіліс.
Тэлекампаніі TRT і Haberturk паказалі кадры людзей, якія сабраліся вакол разбуранага будынка ў Кахраманмарасе ў пошуках тых, хто выжыў.
У Дыярбакыры абрынуўся гандлёвы цэнтр.
Штуршкі адчуваліся ў сталіцы Анкары і іншых турэцкіх гарадах, а таксама па ўсім рэгіёне — на Кіпры, у Ліване і ў Сірыі, дзе, як і ў Турцыі, шмат загінулых.
Як перадае Reuters, Сірыйскія дзяржаўныя СМІ паведамілі, што ў правінцыі Алепа абрынулася вялікая колькасць будынкаў, крыніца ў грамадзянскай службе Хамы паведаміла, што там таксама абрынулася некалькі будынкаў.
«Са сцен у доме ўпалі карціны», — сказаў агенцтву Reuters Самер, жыхар Дамаска. «Я прачнуўся ў жаху. Мы ўсе апрануліся і стаім каля дзвярэй».
Па словах відавочцаў, людзі ў Дамаску, а таксама ў ліванскіх гарадах Бейрут і Трыпалі, выбягалі на вуліцы і садзіліся ў машыны, каб ад'ехаць ад сваіх дамоў на выпадак абвальвання.
Рушдзі Абуалуф, прадзюсар BBC ў сектары Газа, сказаў, што дом, у якім ён жыў, трэсла каля 45 секунд.
Турэцкія сейсмолагі ацанілі моц землятрусу ў 7,4. Па іх словах, праз некалькі хвілін у рэгіёне адбыўся другі штуршок.
Кіраўнік турэцкага Чырвонага Паўмесяца Керэм Кінік заявіў, што мабілізуе рэсурсы для дапамогі пацярпеламу рэгіёну, паколькі маюцца сур'ёзныя пашкоджанні і разбураныя будынкі, і сказаў, што Турцыя гатовая прыняць міжнародную дапамогу.
Турцыя знаходзіцца ў адной з самых актыўных сейсманебяспечных зон у свеце.
Паводле апошніх звестак, у Турцыі загінулі 283 чалавекі, 2383 параненыя. У Сірыі загінулі 237 чалавек.
«Таня, мы з табой!» Улады запусцілі флэшмоб у падтрымку жанчыны ў чырвона-зялёным ВІДЭА27
Каментары