Пачатковая цана двухпакаёвай кватэры дачкі бізнэсоўца Юрыя Авяр'янава Вікторыі Авяр'янавай — амаль 200 тысяч даляраў. Інфармацыя пра аўкцыён з'явілася на пляцоўцы «Белюрзабеспячэнне», заўважыла «Народная Воля».
Двухпакаёўка агульнай плошчай амаль 80 квадратных метраў па адрасе Кірава, 51. Пяціпавярховы дом 1958 года пабудовы знаходзіцца побач са Свіслаччу, на скрыжаванні вуліц Кірава і Купалы.
У кватэры — нядрэнны рамонт, зроблена, але не зацверджана перапланіроўка — санвузел з сумешчанага зрабілі раздзельным, павялічылі плошчу калідора і перанеслі перагародкі, зрабілі гардэробную.
Сярод складанасцяў — арышт следчых органаў, забарона здзяйснення рэгістрацыйных дзеянняў судовага выканаўцы. У кватэры зарэгістраваны адзін непаўналетні.
У аб'яве аб таргах напісана, што кватэра Вікторыі Авяр'янавай. Яна была кіраўніцай клубаў Madison, «Афрыка» і іншых. У 2020 годзе Вікторыю прысудзілі да трох гадоў калоніі за ўхіленне ад выплаты падаткаў, але скарацілі адзін год па амністыі.
Вікторыя Авяр'янава — дачка бізнэсмена Юрыя Авяр'янава. Ён адзін з першых даляравых мільянераў Беларусі, экс-уладальнік аўтарынку ў Малінаўцы, будаўнічага рынку ва Уруччы, парка Dreamland, клуба Madison і іншых забаўляльных устаноў у Менску. У 2010-х у бізнэсоўца пачаліся праблемы праз вялікія ўкладанні ў пашырэнне «Дрымлэнда», а ў 2016 годзе кампанію Авяр'янава «Растэм» прызналі банкрутам. Бізнэсовец з'ехаў у Еўропу.
У 2017 годзе ў дачыненні да Юрыя Авяр'янава і некалькіх кіраўнікоў камерцыйных структур распачалі крымінальную справу ў сувязі з ухіленнем ад выплаты падаткаў. Пазней абвінавачванне ў дачыненні да Авяр'янава пашырылі яшчэ і за злоўжыванне службовымі паўнамоцтвамі. Авяр'янаў быў абвешчаны ў міжнародны вышук і яго затрымлівалі ў Берліне. Менск дамагаўся экстрадыцыі бізнэсоўца на радзіму, але гэтага не адбылося.
Пачатковая цана кватэры — 190 884 даляры.
Цяпер чытаюць
Хто такі Мацвей Бяляй, якога нібыта дэпартавалі ў Беларусь? Расказваем гісторыю дзіўнага актывіста з падазроным мінулым3
Каментары