Банды Гаіці напалі на паліцэйскую акадэмію і аэрапорт, самалёт прэм'ер-міністра сеў у суседнім Пуэрта-Рыка
Правадыр кангламерату дзевяці банд заявіў, што калі прэм'ер не сыдзе, у краіне пачнецца вайна.
Банды Гаіці, якія абвясцілі вайну прэм'ер-міністру Арыэлю Анры, у аўторак напалі на паліцэйскую акадэмію і галоўны аэрапорт краіны; самалёт Анры, які вяртаўся з замежнага турнэ, сеў на суседнім востраве Пуэрта-Рыка, піша Бі-бі-сі.
Правадыр кангламерату дзевяці банд, былы паліцэйскі Джымі Шэрызье па мянушцы Барбекю, у аўторак сабраў журналістаў і заявіў ім, што калі прэм'ер не сыдзе, у краіне пачнецца вайна.
«Калі Арыэль Анры не сыдзе ў адстаўку, калі міжнародная супольнасць працягне падтрымліваць яго, то мы пачнем рухацца проста да грамадзянскай вайны, якая прывядзе да генацыду», — заявіў Барбекю, які знаходзіцца пад санкцыямі ААН за парушэнні правоў чалавека.
У пачатку дня ў аўторак банды атакавалі ў сталіцы Гаіці, Порт-а-Прэнсе, паліцэйскую акадэмію, дзе вучацца больш за 800 кадэтаў. Паліцыя аб'явіла, што штурм быў адбіты.
Па словах відавочцаў, з якімі пагаварылі міжнародныя агенцтвы, стрэлы былі чутныя і каля галоўнага аэрапорта краіны, размешчанага ў Порт-а-Прэнсе міжнароднага аэрапорта імя Тусена Луверцюра.
З аэрапорта спрабавалі выляцець 250 кубінцаў, але не змаглі. «Мы ўжо павінны былі садзіцца ў самалёт, але яны знайшлі ў самалёце дзірку ад кулі», — растлумачыў агенцтву AFP па WhatsApp адзін з пасажыраў.
Аэрапорты Гаіці зараз ахоўваюць салдаты.
Прэм'ер-міністр Гаіці Арыэль Анры на мінулым тыдні паляцеў спачатку на рэгіянальны форум у паўднёваамерыканскай Гаяне, а затым — у Кенію, падпісваць пагадненне аб адпраўцы ў Гаіці міжнароднага паліцэйска-ваеннага кантынгенту.
Падчас адсутнасці прэм'ера Барбекю абвясціў яму вайну. У суботу банды напалі на некалькі паліцэйскіх участкаў, а таксама на дзве турмы ў Порт-а-Прэнсе, з якіх выпусцілі некалькі тысяч зняволеных.
Пасля гэтага ўрад абвясціў надзвычайнае становішча і каменданцкую гадзіну.
На працягу некалькіх дзён аб месцазнаходжанні Арыэля Анры нічога не было вядома, але ў аўторак улады Пуэрта-Рыка — гэты востраў уваходзіць на асаблівых правах у склад ЗША — пацвердзілі, што самалёт Анры прызямліўся ў іх.
Перад гэтым, па даных прэсы, прэм'еру адмовіла ў пасадцы Дамініканская Рэспубліка, якая мяжуе з Гаіці.
Цяпер чытаюць
Дзе працуюць і як выглядаюць жонкі топ-чыноўнікаў?16
Дзе працуюць і як выглядаюць жонкі топ-чыноўнікаў?
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1111
Каментары