Затрымалі на працоўным месцы: што вядома пра палітзняволенага аператара АНТ Антона Казельскага
Былы сукамернік палітвязня, з якім яны разам адбывалі адміністрацыйны арышт на Акрэсціна, распавёў «Вясне» падрабязнасці затрымання Антона.
У Мінскім гарадскім судзе 20 траўня распачаўся суд над 38-гадовым аператарам АНТ Антонам Казельскім. Яго абвінавачваюць паводле ч. 3 арт. 361 (заклікі да санкцыяў і іншых дзеянняў, накіраваных на шкоду нацыянальнай бяспецы), а таксама ч. 1 арт. 130 (распальванне іншай сацыяльнай варожасці або варажнечы). На волі Антона чакаюць жонка і чацвёра дзяцей. Былы сукамернік палітвязня, з якім яны разам адбывалі адміністрацыйны арышт на Акрэсціна, распавёў «Вясне» падрабязнасці затрымання Антона.
Былы арыштант Акрэсціна Сяргей (імя зменена ў мэтах бяспекі) некаторы час у адной камеры знаходзіўся разам з Антонам Казельскім. Паводле слоў Сяргея, аператара АНТ у кастрычніку 2023 года затрымалі супрацоўнікі ГУБАЗіКу наўпрост на працоўным месцы. Вядома, што на момант затрымання жонка палітвязня была цяжарная і неўзабаве нарадзіла чацвёртае дзіця.
Са словаў сукамернікаў, мужчына прапрацаваў на тэлевізіі паўтара года (з 2022 па 2023 год), а потым у яго знайшлі каментары за 2020 год, у якіх ён нібыта заклікаў выходзіць людзей на пратэст.
«З таго, што Антон распавядаў: яго ўзялі за каментары з заклікамі выходзіць на вуліцу. Хоць сам ён нікуды не хадзіў, за што з яго асобна смяяліся сілавікі, маўляў, «канапавы герой».
Прыехаў на працу, здаецца, па званку калегі або непасрэднага начальніка. З апаратурай (відэакамеры, штатывы). Каля офіса яго сустрэў той, хто тэлефанаваў, нічога не патлумачыўшы, паклікаў за сабой і сказаў: «Тэхніку таксама вазьмі». Відаць было, што чалавек баіцца і засмучаны тым, што патэлефанаваў, сустрэў і выпраўляе. Прывялі ў адзін з кабінетаў у офісе. Далей допыт: «пакажы тэлефон» і іншая класіка. Па прыездзе ў РУУС забралі тэхніку і забралі «на захоўванне». Туды — на захоўванне — трапілі і асабістыя «складаныя тэхнічныя прылады», што менавіта — не памятаю, магчыма, асабісты фотаапарат і ноўтбук. Антон быў засмучаны тым, што чалавек, які выклікаў яго, сказаў узяць апаратуру з машыны з сабой у офіс. АНТшнае абсталяванне, што было пры ім, засталося ў РУУС», — распавядае сукамернік палітвязня.
Сяргей узгадвае, што Антон спрабаваў зрабіць прыемнае сваёй жонцы нават з-за кратаў: «зляпіў ёй кветку з хлеба і спрабаваў яе перадаць на волю».
Пасля адміністрацыйнага арышту Антона перазатрымалі ў межах крымінальнай справы. Цяпер яго абвінавачваюць паводле двух артыкулаў: ч. 3 арт. 361 КК (заклікі да санкцыяў і іншых дзеянняў, накіраваных на шкоду нацыянальнай бяспецы) і ч. 1 арт. 130 КК (распальванне іншай сацыяльнай варожасці або варажнечы). Суд над ім распачаўся 20 траўня ў Мінскім гарадскім судзе. Справу разглядае суддзя Святлана Макарэвіч.
Падтрымайце Антона грашовымі пераводамі і пасылкамі:
СІЗА-1. 223016, Навадворскі сельсавет, 143/4, в. Пашковічы, Мінскі раён, Мінская вобласць. Антон Уладзіміравіч Казельскі
Жыхар Іванава сплаціў $600 тысяч кампенсацыі за данаты, але ўсё адно атрымаў 5,5 года зняволення3
Жыхар Іванава сплаціў $600 тысяч кампенсацыі за данаты, але ўсё адно атрымаў 5,5 года зняволення
«На працягу 30 гадоў незалежнасці беларускамоўныя бюлетэні задавальнялі ўсіх». Камуністы абвінавацілі Бондараву ў распальванні варожасці на моўнай глебе1515
Каментары