Беларусам пад міжнароднай абаронай у Польшчы стане прасцей зрабіць запрашэнні на візу для сваякоў
МЗС Польшчы пацвердзіла, што беларусам, якія знаходзяцца пад міжнароднай абаронай, дастаткова натарыяльнага запрашэння на візу для родных.
Паводле агульнага правіла, запрашэнні для афармлення візы сваякам у Польшчу афармляюцца праз ваяводства. Такія запрашэнні могуць рабіць грамадзяне Польшчы, уладальнікі пастаяннага дазволу на жыхарства або асобы з часовым дазволам на жыхарства (ДНЖ), якія пражываюць у Польшчы мінімум пяць гадоў.
Для беларусаў, у якіх няма ПМЖ і якія знаходзяцца ў Польшчы менш за пяць гадоў, такая магчымасць адсутнічае. Аднак Міністэрства замежных спраў Польшчы гатова зрабіць выключэнне для тых грамадзян Беларусі, якія знаходзяцца ў Польшчы пад міжнароднай абаронай.
Блок Пракоп'ева-Ягорава ў Каардынацыйнай радзе апублікаваў афіцыйны адказ консульскага дэпартамента МЗС Польшчы.
У дакуменце гаворыцца, што беларусы, якія маюць міжнародную абарону, могуць афармляць запрашэнні для сваякоў, завераныя натарыусам. Пры гэтым заяўнік пры падачы на візу павінен прадставіць доказы роднасных сувязяў з тым, каго запрашае на візу, а таксама копію дазволу на жыхарства і дакумент, які пацвярджае статус асобы, якая знаходзіцца ў Польшчы.
З-за кадравых абмежаванняў у консульскіх органах Польшчы ў Беларусі, МЗС раіць загадзя ўзгадняць падачу такіх дакументаў.
Акрамя таго, блок вядзе перамовы пра магчымасць падачы на візу па натарыяльных запрашэннях напрамую праз консульствы, без звароту ў візавыя цэнтры. Гэта важна для абароны персанальных даных тых, хто знаходзіцца ў Польшчы пад міжнароднай абаронай.
Малады работнік «Мінск-Арэны» павінен заплаціць 71 мільён даляраў4
Каментары