У Расіі зафіксавалі рэкордную за 15 гадоў колькасць цяжкіх і асабліва цяжкіх злачынстваў
Хаця агульная колькасць злачынстваў у РФ знізілася да мінімуму за 15 гадоў, аднак колькасць цяжкіх і асабліва цяжкіх дасягнула рэкорду. Рост лічбаў у гэтай катэгорыі працягваецца трэці год запар.
У 2025 годзе ў Расіі было здзейснена 627,9 тысячы цяжкіх і асабліва цяжкіх злачынстваў, сведчаць даныя МУС, звярнула ўвагу «Вёрстка».
Гэты паказчык з'яўляецца рэкордным за апошнія 15 гадоў — больш злачынстваў цяжкага і асабліва цяжкага характару апошні раз фіксавалі толькі ў 2010 годзе.
Рост колькасці цяжкіх і асабліва цяжкіх злачынстваў працягваецца ўжо трэці год запар. У 2023 годзе ён склаў 9,7% (колькасць злачынстваў дасягнула 589 тысяч), у 2024 годзе — 4,8% (617,3 тысячы злачынстваў), а ў 2025 годзе — 1,7%.
Мацней за ўсё колькасць цяжкіх і асабліва цяжкіх злачынстваў узрасла ў рэгіёнах Далёкага Усходу і Дагестане. Так, у Якуціі гэты паказчык вырас на 60,7% (да 5,7 тысячы злачынстваў), на Камчатцы — на 18,7% (да 1,8 тысячы), у Дагестане — на 15,3% (да 5,3 тысячы) і на Сахаліне — на 12% (да 2,5 тысячы).
Пры гэтым агульная колькасць зафіксаваных у Расіі злачынстваў у 2025 годзе знізілася на 7,3% — да 1 млн 771 тысячы. Гэта рэкордна мінімальнае значэнне за як мінімум апошнія 15 гадоў.
Да катэгорыі цяжкіх і асабліва цяжкіх адносяцца наўмысныя злачынствы, за ўчыненне якіх прадугледжана пакаранне ў выглядзе пазбаўлення волі на тэрмін звыш пяці і дзесяці гадоў адпаведна. Напрыклад, разбой, вымагальніцтва ў буйным памеры, забойства, а таксама цэлы шэраг наркатычных артыкулаў.
Каментары
"Героі" вазврашчаюцца с фронта!