Штэфан Фюле асудзіў затрыманне Лябедзькі, Калякіна і Атрошчанкава

Еўракамісар па пытаннях пашырэння і палітыцы добрасуседства Штэфан Фюле асудзіў затрыманне ў Оршы трох прадстаўнікоў беларускай апазіцыі. Пра гэта БелаПАН паведаміла прэс-сакратар еўракамісара Анка Падурару.

Сёння ў Бруселі Штэфан Фюле прэзентуе новую праграму ЕС «Еўрапейскі дыялог для мадэрнізацыі Беларусі». На прэзентацыі не змаглі прысутнічаць лідар Аб’яднанай грамадзянскай партыі Анатоль Лябедзька, старшыня Беларускай партыі левых «Справядлівы свет» Сяргей Калякін і прэс-сакратар кампаніі «Еўрапейская Беларусь» Аляксандр Атрошчанкаў. Яны былі знятыя з цягніка Мінск — Масква ў Оршы ў ноч з 27 на 28 сакавіка. З расійскай сталіцы яны планавалі вылецець у Брусель. Спачатку супрацоўнікі мытні заявілі, што апазіцыянеры падазраюцца ў транспарціроўцы наркатычных сродкаў, пазней стала вядома, што іх абвінавачваюць у дробным хуліганстве, нібыта ўчыненым у цягніку. Суд над затрыманымі праходзіць цяпер у Оршы. Увесь час да суда апазіцыянеры знаходзіліся ў ізалятары часовага ўтрымання.

«Мы асуджаем той факт, што ўлады перашкодзілі некаторым удзельнікам прыехаць у Брусель. Але гэта не перашкодзіць нам узяць да ўвагі і зрабіць неад’емнай часткай дыялогу погляды гэтых людзей. Можаце не сумнявацца, мы ўключым у гэты дыялог усіх, хто мае бачанне лепшай, еўрапейскай будучыні для Беларусі», — заявіў сёння ў Бруселі еўракамісар Фюле.

Антон Тарас, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ