Кіраўнік Магілёва: Беларусь рухаецца да змешанай сістэмы выбараў
Беларусь рухаецца ў кірунку дэмакратызацыі, устанаўлення змешанай сістэмы выбараў, заявіў 21 лістапада на пасяджэнні Магілёўскага гарвыканкама яго старшыня Станіслаў Барадаўка падчас разгляду пытання аб дзейнасці грамадскіх аб`яднанняў і палітычных партый.
«Ад гэтага мы нікуды не дзенемся. Мы жывем у дэмакратычным грамадстве. Сёння Расія гэтым карыстаецца, сёння Украіна гэтым карыстаецца», — адзначыў кіраўнік горада.
Пры такой сістэме, паводле яго слоў, прадстаўнічыя і заканадаўчыя органы ўлады павінны быць сфарміраваны дэмакратычна, «але каб іх галасы не падзяляліся 51% на 49%, і яны потым не рвалі кожны законапраект, і не цягнулі ў свой бок».
Барадаўка адзначыў, што апошнім часам у дзяржслужачых назіраецца моцнае дыстанцыяванне ад такіх дзяржаўных свят, як 7 лістапада ці 1 мая. «Вось мы кажам, што 7 лістапада праводзяць камуністы і ветэраны, 1 мая — прафсаюзы. Але ж гэта святы, якія ў календары чырвоным колерам пазначаны. Яны дзяржаўныя святы. Таму мы павінны пачынаючы з найбліжэйшага названага мною свята быць побач з тымі, хто гэта свята святкуе, і не проста ўдзельнікамі, а дзесьці ініцыятарамі», — заявіў старшыня Магілёўскага гарвыканкама.
Паводле меркавання Барадаўкі, час, калі дзяржаўны служачы павінен быў дыстанцыявацца ад нейкіх палітычных поглядаў — левых, правых або цэнтрысцкіх — прайшоў.«Мы сёння маем права быць членамі грамадскіх арганізацый, палітычных партый», — сказаў ён.
Паводле даных, прыведзеных начальнікам упраўлення ідэалагічнай працы Алай Галушкай, па стане на 1 лістапада 2012 года ў Магілёве ажыццяўлялі сваю дзейнасць 103 грамадскія і 11 нацыянальных аб`яднанняў, 5 палітычных партый, 634 арганізацыйныя структуры прафесійных саюзаў.
Самая шматлікая сярод грамадскіх арганізацый горада — Магілёўская гарадская арганізацыя Беларускага таварыства аб`яднання ветэранаў (258 пярвічных арганізацый, 87.200 ветэранаў вайны і працы, узброеных сіл і праваахоўных органаў, у тым ліку 965 ветэранаў Вялікай Айчыннай вайны).
У гарадскую арганізацыю БРСМ уваходзіць 20 тыс. чалавек, у ГА «Белая Русь» — 4.440 чалавек.
З адзінаццаці нацыянальных аб`яднанняў горада — тры рускія, тры яўрэйскія, украінская, польская, армянская, грузінская і азербайджанская арганізацыі.
Цяпер чытаюць
Былога беларускага палітвязня судзяць у Літве за падрыхтоўку да забойству расійскага апазіцыянера. Пагражае аж да пажыццёвага6
Каментары