Dziaŭčynka naradziłasia ŭ małodšaj siastry Aliny Kabajevaj.
U Lejsan Kabajevaj, małodšaj siastry kachanki Uładzimira Pucina Aliny Kabajevaj, naradziłasia dačka pa imieni Miełanija. Dziaŭčynka źjaviłasia na śviet 1 maja 2025 hoda, a jaje baćkam paznačany 28‑hadovy na toj momant uradženiec Kisłavodska Karp Bahian. Pra heta śviedčać uciečki źviestak ZAHSa, ź jakimi aznajomiłasia «Ahiencstva».
Dziaŭčynka naradziłasia ŭ Maskvie, u Nacyjanalnym miedycynskim daśledčym centry akušerstva, hiniekałohii i pierynatałohii imia Kułakova. U hetym ža centry ŭ mai 2019 hoda naradžała i sama Alina Kabajeva — jak miarkujecca, małodšaha syna prezidenta Uładzimira.
Užo praz dva dni paśla naradžeńnia Miełaniju zarehistravali ŭ ZAHSie pry MFC rajona Kańkova. U toj ža dzień Karp Bahian ustanaviŭ baćkoŭstva — takaja pracedura nieabchodnaja, kali baćki nie znachodziacca ŭ šlubie. U hetym vypadku baćku nie ŭpisvajuć u paśviedčańnie ab naradžeńni aŭtamatyčna: dla hetaha baćki padajuć u ZAHS sumiesnuju zajavu. Paśla jaje padačy dziaŭčynku zapisali na proźvišča baćki — Miełanija Karpaŭna Bahian. Źviestak pra šlub Kabajevaj i Bahiana va ŭciečkach niama.
Źviestki pra naradžeńnie dački Lejsan Kabajevaj «Ahienctva» znajšło ŭ dvuch ahrehatarach uciečak. Akramia zapisaŭ ZAHSa, dziaŭčynka fihuruje va ŭciečcy bazy pacyjentaŭ adnoj z maskoŭskich miedycynskich ustanoŭ — z tym ža numaram paśviedčańnia ab naradžeńni i adrasam u kvatery jaje maci.
Karp Bahian naradziŭsia ŭ listapadzie 1996 hoda ŭ Kisłavodsku, tam ža jon zarehistravany. Jon na dziesiać hadoŭ maładziejšy za Lejsan Kabajevu.
Škołu skončyŭ u Maskvie, u 2019 hodzie atrymaŭ stupień bakałaŭra pa rekłamie i suviaziach z hramadskaściu ŭ REU imia Plachanava, a ŭ 2022‑m — stupień mahistra pa mieniedžmiencie ŭ piacihorskim filijale toj ža VNU.
Uciečki baz avijapieravozčykaŭ pakazvajuć, što ź listapada 2022‑ha pa červień 2023 hoda Lejsan Kabajeva nie mienš za dziesiać razoŭ latała ŭ Minieralnyja Vody — bližejšy da Kisłavodska aeraport — i zastavałasia tam ad niekalkich dzion da troch tydniaŭ. U tyja ž miesiacy hetym ža maršrutam rehularna lotaŭ i Bahian.
Lejsan Kabajevaj 40 hadoŭ, jana naradziłasia ŭ Taškiencie. Kiruje ahienctvam nieruchomaści «Rezierv-M».
Z krasavika 2026 hoda taksama ŭznačalvaje picierskaje AAT «Nova». Kampanija zdaje ŭ arendu niežyłuju nieruchomaść, a jaje aktyvy na kaniec 2025 hoda skłali 226 młn rubloŭ. Uładalniki kampanii nieviadomyja, ale da Lajsan hienieralnym dyrektaram «Novy» była Kaciaryna Hałavačova, stryječnaja siastra Kabajevych.
U 2017—2018 hadach Lejsan latała razam ź siastroj na Maldyvy na biźnies-džetach, vyśvietliŭ «Prajekt», vyvučyŭšy ŭciečku źviestak pamiežnaj słužby FSB. U 2019 hodzie małodšaja siastra abrańnicy prezidenta padarožničała na pryvatnym samalocie ŭ Charvatyju razam sa svajoj maci i Śviatłanaj Palakovaj, kachankaj kiraŭnika MZS Rasii Siarhieja Łaŭrova.
Pa supadzieńni, praź niekalki miesiacaŭ paśla naradžeńnia Miełanii Bahian pra hetaje imia zahavaryła hienieralnaja dyrektarka telekanała TNT Cina Kandełaki. Jana ŭzhadała, što ŭ 2000 hodzie vyrašyła tak nazvać svaju dačku i ŭžo tady nibyta zrabiła heta ŭ honar budučaj pieršaj łedzi ZŠA Miełanii (tady Knaŭs, ciapier Tramp).
Niezadoŭha da rodaŭ televiadučaja, pavodle jaje słoŭ, hladzieła konkurs pryhažości, u jakim udzielničała Miełanija. Pad uražańniem ad jaje pryhažości Kandełaki i abrała imia dla svajho budučaha dziciaci.
Ciapier čytajuć
Naładžvajecca biznes pa afarmleńni rasijanami biełaruskich VNŽ na fiktyŭnych padstavach. Usio dziela kupli aŭto na biełaruskich numarach4
Kamientary