Ekskavatar užo znosić minskuju «Biełuju krepaść» — adziny pryvatny dom siarod zabudovy šmatpaviarchovikaŭ VIDEA
«Histaryčny momant» — dvuchpaviarchovy katedž 18 hadoŭ supraciŭlaŭsia znosu, pakul vakoł jaho ŭzvodzili šmatpaviarchoviki ŽK «Arkadzija». Ciapier ekskavatar raźbiraje dom.
Kadry znosu «Biełaj krepaści» na vulicy Ekskavatarnaj, 18, minčuki publikujuć u Threads. Ekskavatar užo razabraŭ častku ścien i dachu. U kamientarach pišuć pra «kaniec epochi».
Historyja supraćstajańnia pačałasia ŭ 2008 hodzie, kali kampanija «Tambaz» stała znosić pryvatny siektar kala skryžavańnia vulic Bahdanoviča i Niakrasava dziela budaŭnictva ŽK «Arkadzija».
Bolšaść uładalnikaŭ pahadzilisia pierajechać u prapanavanyja kvatery. Haspadar biełaha katedža nastojvaŭ na raŭnacennym domie: jon ličyŭ acenku svajoj majomaści zanižanaj na 60%. U domie žyli vosiem čałaviek — čatyry pakaleńni siamji.
U vyniku katedž apynuŭsia spačatku siarod katłavanaŭ, a potym — pasiarod šmatpaviarchovikaŭ. Za biełyja ścieny i ŭpartaść žycharoŭ jaho prazvali «Biełaj krepaściu».
Uzamien siamja atrymała dvuchkvaterny dom na Staražoŭcy, ale biez azdableńnia: unutry nie było padłohi, dźviarej i santechniki, a vadu, elektryčnaść i haz haspadaru daviałosia padvodzić za svoj košt.
Zabudoŭščyk abaviazaŭsia vypłacić hrošy zamiest azdobnych prac, adnak siamja ich tak i nie atrymała. Paźniej «Tambaz» zbankrutavaŭ, a «Arkadziju» dabudoŭvała dziaržaŭnaje pradpryjemstva — UKB Savieckaha rajona.
Stary katedž pierastaŭ naležać siamji paśla afarmleńnia novaha, ale ludzi praciahvali tam žyć. U sakaviku 2026 hoda ich prymusova vysielili pavodle sudovaha rašeńnia. Padrabiazna pra hetuju historyju raskazvaŭ Onliner.
Što ciapier budzie na miescy «Biełaj krepaści», dakładna nie viadoma.
Ciapier čytajuć
Naładžvajecca biznes pa afarmleńni rasijanami biełaruskich VNŽ na fiktyŭnych padstavach. Usio dziela kupli aŭto na biełaruskich numarach4
Kamientary