U ramkach «novaj architektury biaśpieki» Maskva prapanuje vyvieści jadziernuju zbroju i «Iskandery» ź Biełarusi — infarmacyja pra pieramovy ŭ Abu-Dabi

Pavodle infarmacyi infarmavanaha niamieckaha vydańnia Bild, rasijskija pradstaŭniki na pieramovach u Abu-Dabi pieradali amierykanskamu, ukrainskamu i jeŭrapiejskamu bakam svajo bačańnie «novaj jeŭrapiejskaj architektury biaśpieki».

Maskva prapanuje zachavać za saboj akupavanyja terytoryi Ukrainy i atrymać uvieś Danbas, uklučajučy jašče nie akupavanyja Słaviansk i Kramatorsk. Akramia taho, rasijski płan praduhledžvaje admovu ad raźmiaščeńnia vajennych baz NATA ŭ Estonii, Łatvii i Litvie, a taksama vyklučeńnie Finlandyi z aljansu.

Akramia taho, Ukraina pavinna atrymać pazabłokavy status i abaviazacca nie ŭstupać u NATA, adnak jaje ŭstupleńnie ŭ Jeŭrasajuz nie vyklučajecca. Party Adesy i Mikałajeva prapanujecca demilitaryzavać, kab Ukraina nie mahła vykarystoŭvać ich u jakaści vajenna-marskich baz. Taksama praduhledžvajucca damoŭlenaści ab svabodzie sudnachodstva ŭ Čornym i Bałtyjskim morach.

Patrabavańni Maskvy zakranajuć i Małdovu. Rasija prapanuje pieraŭtvaryć jaje ŭ fiederatyŭnuju respubliku, jakaja ŭklučaje samu Małdovu, a taksama aŭtanomny rehijon Hahauzija, jaki ŭvachodzić u jaje skład, i niepryznanaje Prydniastroŭje. U vypadku ŭstupleńnia krainy ŭ ES Prydniastroŭje i Hahauzija pavinny atrymać mahčymaść pravieści refierendumy ab niezaležnaści.

U abmien rasijski bok prapanuje vyvieści jadziernuju zbroju ź Biełarusi i admovicca ad raźmiaščeńnia tam rakiet siaredniaj dalokaści — «Iskanderaŭ» i «Arešnikaŭ». Akramia taho, Maskva hatovaja vyvieści vojski z Prydniastroŭja.

Bild padkreślivaje, što havorka idzie tolki pra adnu z prapanoŭ, jakija abmiarkoŭvajucca ŭ nieaficyjnych pieramoŭnych kołach. Pieramoŭnaja taktyka Rasii takaja, što jaje pradstaŭniki stvarajuć uražańnie, što nieviadoma, jaki z płanaŭ padtrymaŭ Uładzimir Pucin.

Kali infarmacyja krynic Bild praŭdzivaja, značyć, Maskva raźmiaščała jadziernuju zbroju ŭ Biełarusi — ci zajaŭlała pra raźmiaščeńnie, bo niajasna, ci ŭ realnaści taja zbroja raźmieščanaja — u jakaści raźmiennaj maniety dla budučych pieramovaŭ. Alaksandr Łukašenka, nahadajem, śćviardžaŭ, što raźmiaščeńnie ažyćciaŭlajecca pa jaho prośbie. Hatoŭnaść vyvieści jadzierku i «Iskandery» pakazvaje, što Maskva razhladała b Biełaruś jak harantavany padkantrolny aktyŭ u vypadku kali taki padzieł Jeŭropy byŭ by zaćvierdžany. 

Prezident Ukrainy Uładzimir Zialenski zajaviŭ, što Ukraina nie pahodzicca na takija patrabavańni Rasii. «Rasija choča nie harantyj biaśpieki, a mahčymaści ŭmiešvacca ŭ čužyja spravy», — skazaŭ jon. Krainy Jeŭrasajuza na samicie ŭ Dublinie zajavili, što krainy Jeŭropy sami buduć vyznačać svaju architekturu biaśpieki.

• 0
• 0
• 0
• 0
• 0
• 0
• 0
• 0