«Reanimavali doma 40 chvilin». Što viadoma pra pamierłuju paśla vypiski z radzilni 32‑hadovuju błohierku z Čerykava

Adny pisali, što ŭ Asi novaja staronka, što jana niadaŭna naradziła dziaŭčynku i paru dzion tamu vypisałasia z radzilni — «i ŭsio ź joj dobra». Inšyja zapeŭnivali, što Anastasija pamierła: «U jaje adarvaŭsia tromb, i heta, na žal, praŭda». Onliner parazmaŭlaŭ z mamaj i najlepšaj siabroŭkaj Anastasii pra toje, što adbyłosia. Padrabiaznaści — u materyjale.

«Ja abdymaju kožnuju, u kaho było kiesarava, dziaŭčatki»

Anastasii Marozavaj było 32 hady. Jana žyła ŭ nievialikim horadzie Čerykavie ŭ Mahiloŭskaj vobłaści. Da pieršaha dekretu pracavała pradaŭcom, a paśla źjaŭleńnia TikTok stała vieści błoh pra svajo žyćcio i zdymać karotkija roliki.

U adnym ź videa, apublikavanym 22 kastryčnika, dziaŭčyna raspaviała pra «składanyja rody»: pavodle jaje słoŭ, «dzieviacihadzinnyja schvatki skončylisia ekstrannym kiesaravym siačeńniem i reanimacyjaj». «Ja abdymaju kožnuju, u kaho było kiesarava, dziaŭčatki», — napisała błohierka.

U toj dzień u siamji Anastasii naradziłasia druhaja dačka — Mirasłava.

6 listapada Anastasiju razam z novanarodžanaj dačkoj vypisali z radzilni. Na staroncy błohierki jość karotki rolik, na jakim jana razam z mužam vychodzić z radzilni. Praz try dni jaje nie stała.

— Naścia nazirałasia ŭ Čerykavie, ale naradžać jaje adpravili ŭ Minsk, u RNPC «Maci i dzicia», — raspaviała Onliner mama Anastasii Hajane.

— Čamu?

— Byli pakazańni. Ale ja nie chacieła b ciapier udavacca ŭ detali.

— Raspaviadzicie, što adbyłosia ŭ paniadziełak, 9 listapada.

— Naścia jašče a vośmaj hadzinie viečara była na nahach i pry śviadomaści, a ŭ 21:20 užo niekalki razoŭ nieprytomnieła, — zhadvaje Hajane. — Doma ź joj była starejšaja dačka, joj 12 hadoŭ. Daviedaŭšysia pra toje, što zdaryłasia, spačatku pryjechaŭ muž, potym — rodny brat. Praź dźvie-try chviliny paśla ich prybyła chutkaja.

— Pierad hetym Anastasija na niešta skardziłasia?

— Ni na što. Jak kažuć, ništo nie pradviaščała biady… Kali pryjechała chutkaja, Naścia jašče była pry śviadomaści, ale ŭžo ničoha nie kazała. Reanimacyju pravodzili prosta ŭ nas doma, kala 40 chvilin jaje «pampavali», ale vyratavać nie zmahli.

Pavialičyć

Cieła Anastasii adpravili na ŭskryćcio ŭ Kryčaŭ. Pavodle słoŭ maci, tudy pryjazdžali sudmiedekśpierty z Mahilova.

— My tolki vyjšli sa Śledčaha kamiteta, dzie davali pakazańni (razmova była ŭviečary čaćviarha). Ja chaču viedać praŭdu: čamu majo dzicia ciapier lažyć u ziamli?

— Jak vy dumajecie, što mahło adbycca?

— Ekśpiertyza budzie hatovaja tolki praź miesiac — tady i stanuć viadomyja dakładnyja pryčyny. Ja jašče nie razmaŭlała z daktarami ź Minska. Toje, što pisali pra adarvany tromb, niechta prydumaŭ. Pakul ničoha nie zrazumieła.

«Abmiarkoŭvali, jak budziem chryścić małyšku»

Za niekalki hadzin da trahiedyi Naścia paśpieła pahavaryć z najlepšaj siabroŭkaj Kaciaj. Dziaŭčaty siabravali vosiem hadoŭ.

— Niahledziačy na toje što ja z Rasii, my byli na suviazi 24/7, pakul jana lažała ŭ balnicy. U paniadziełak taksama stelefanoŭvalisia i raźvitalisia kala piataj hadziny viečara. Asia (tak jaje nazyvała siabroŭka) była ščaślivaj, uśmichałasia. My budavali płany, abmiarkoŭvali, jak budziem chryścić Mirasłavu. Mnie prapanavali stać jaje chrosnaj…

— Jana raspaviadała, jak prajšli rody?

— Tak. Kazała, što jaje adpravili ŭ «Maci i dzicia», tamu što bajalisia za dzicia. Padrabiaznaści ja b nie chacieła ahučvać. Asia kazała, što daktary rapanavali joj zrabić kiesarava 20 kastryčnika, ale jana admoviłasia. Joj chaciełasia naradzić samoj, jak i pieršaje dzicia. Jana kazała: «Davajcie dačakajemsia, pakul adyduć vody». Jany adyšli 22 kastryčnika, padniaŭsia cisk, i jana dzieviać hadzin lažała sa schvatkami (u videa Anastasija taksama ahučvała hety pramiežak času i łancužok padziej, za vyklučeńniem epizodu z padvyšanym ciskam) Paśla hetaha joj zrabili kiesarava.

Pavialičyć

— Jak vy daviedalisia pra śmierć Naści?

— Mnie paviedamiła jaje mama Hajane. Jany razmaŭlali pa telefonie, kali Asi stała błaha, i mama vyklikała chutkuju. Pakul taja jechała, dadomu prymčalisia muž i brat. Ale vyratavać Naściu nie zmahli.

— U vas jość mierkavańnie, što mahło adbycca?

— Jaje vypisali ŭ piatnicu, a praz try dni jana pamierła. Ale takoha prosta tak być nie moža…

Z Anastasijaj raźvitalisia ŭ sieradu, 11 listapada. Pavodle słoŭ siabroŭki, na pachavańnie dziaŭčyny pryjšli niekalki socień čałaviek. Niekatoryja pryjechali ŭ Čerykaŭ navat ź inšych haradoŭ. Ciapier pra novanarodžanuju dačku Anastasii kłapociacca blizkija.

• 0
• 0
• 0
• 0
• 0
• 0
• 0
• 0