Maštabny hłabalny zboj u pracy sistem Microsoft pryvioŭ da niepaładak u pracy — a ŭ šerahu vypadkaŭ i da poŭnaha adklučeńnia — cełaha šerahu servisaŭ, uklučajučy elektronnuju poštu i pradukty na bazie štučnaha intelektu, piša Bi-bi-si.
Pavodle źviestak sajta dla adsočvańnia zbojaŭ Downdetector, pik paviedamleńniaŭ pra prablemy z paštovym servisam Outlook prypaŭ na viečar čaćviarha, 20:00 pa Minsku: było zafiksavana kala 140 000 skarhaŭ pa ŭsim śviecie.
U Microsoft zajavili, što pryčynaj zboju nie byŭ incydent z kibierbiaśpiekaj, adnak sproby likvidavać niepaładki pakul nie prynieśli istotnych vynikaŭ.
Voś što da ciapierašniaha momantu viadoma pra toje, jakija servisy paciarpieli i što mienavita pajšło nie tak.
Što nie pracuje?
«Prablemy z padklučeńniem» zakranuli słužby Microsoft 365, u tym liku Teams, Outlook i prahramnaje zabieśpiačeńnie na bazie štučnaha intelektu Microsoft Copilot.
Karystalniki skardzilisia, što nie mohuć adpraŭlać ci atrymlivać elektronnyja listy, prahladać peŭnyja fajły abo danyja ŭ svaich kalandarnych prahramach.
Pry hetym niekatoryja karystalniki pa-raniejšamu mohuć paŭnavartasna pracavać u Teams, abmieńvacca paviedamleńniami i pravodzić anłajn-sustrečy ŭ zvyčajnym režymie.
Kolki karystalnikaŭ zakranuta?
Dakładny maštab zbojaŭ pakul nie paćvierdžany, adnak pavodle źviestak Downdetector, na prablemy ŭ čaćvier viečaram skardzilisia kala 140 000 čałaviek z 74 krain. Na nastupny dzień ranicaj (kala 07:00 pa Hrynvičy) było 43 000 paviedamleńniaŭ pra prablemy z Microsoft Outlook.
Zhodna z sajtam Microsoft, prahramami pakieta Microsoft 365 karystajucca bolš za 430 miljonaŭ čałaviek.
Hetaje prahramnaje zabieśpiačeńnie vykarystoŭvajuć kampanii pa ŭsim śviecie, tamu čakajecca, što zboj moža adbicca i na pracy inšych servisaŭ.
Pra prablemy, vyklikanyja zbojem, paviedamili taksama technałahičnyja kampanii OpenAI i Anthropic.
U kampanii OpenAI, jakaja stvaryła ChatGPT, zajavili, što vyvučajuć niepaładki, jakija zakranajuć padklučeńnie da servisaŭ Microsoft — praź ich niekarektna pracujuć niekatoryja instrumienty.
Ź ciažkaściami sutyknulisia i dziaržaŭnyja viedamstvy — u pryvatnaści, urad Sinhapura i aŭstralijskaja śpiecsłužba. U Japonii zboi zakranuli ŭradavyja struktury i šmatlikija bujnyja kampanii. Namieśnik hienieralnaha sakratara kabinieta ministraŭ Masanaa Adzaki papiaredziŭ, što praca ahulnaj IT-infrastruktury ŭrada, jakaja vykarystoŭvaje rašeńni Microsoft, sutyknułasia ź pierabojami. Miascovyja ŚMI paviedamili, što niekatoryja banki i finansavyja arhanizacyi byli vymušanyja vykarystoŭvać faksy dla paćviardžeńnia tranzakcyj.
Pra mahčymyja ciažkaści papiaredzili brytanskija palikliniki i kabiniety siamiejnych lekaraŭ, niekatoryja ź ich prosiać pacyjentaŭ źviartacca pa terminovych pytańniach pa telefonie, a nie praz elektronnuju poštu ci veb-formy. Brytanskaja palicyja taksama zaklikała telefanavać, a nie karystacca anłajn-formaj.
Jak piša Financial Times, šviejcarskaja hrupa kampanij Richemont, uładalnik brendaŭ Cartier i Chloé, była vymušanaja adkłaści publikacyju svaich paŭhadavych finansavych vynikaŭ u piatnicu, a amierykanski vytvorca elektryčnych hruzavikoŭ Workhorse Group pieranios pradstaŭleńnie kvartalnaj spravazdačnaści, zapłanavanaje na čaćvier.
Što pajšło nie tak?
U Microsoft vyklučyli viersiju pra kibierataku i patłumačyli zboj, jaki adbyŭsia, «padvyšanaj nahruzkaj» na infrastrukturu.
Hety termin aznačaje, što sierviery pracujuć va ŭmovach značna bolš vysokaj nahruzki, čym zvyčajna.
Pavodle zajavy kampanii, padčas zboju vialikaja kolkaść siervieraŭ «niečakana stała niedastupnaj», praz što ŭzros patok zapytaŭ da astatnich siervieraŭ, što pryviało da ich pierahruzki.
U apošnim abnaŭleńni kampanija paviedamiła, što źjavilisia «pieršyja prykmiety» stabilizacyi sistem, adnak ich stan pakul niedastatkova stabilny. Prapusknaja zdolnaść servisaŭ «jašče nie viarnułasia da narmalnaha ŭzroŭniu».
«U miežach hetych mier my pavialičvajem čas čakańnia dastaŭki elektronnych listoŭ (timeout window) da 48 hadzin. Heta dazvolić zachavać paviedamleńni, zatrymanyja praz zboj, pakul praciahvajecca adnaŭleńnie pracy servisaŭ», — havorycca ŭ paviedamleńni.
Pad «časam čakańnia dastaŭki» (email timeout window) u hetym kantekście razumiejecca pieryjad, na praciahu jakoha paštovy klijent — naprykład, Outlook — budzie čakać atrymańnia ŭvachodnaha lista.
Microsoft robić hety krok, kab paźbiehnuć situacyi, pry jakoj listy, adpraŭlenyja ź inšych sistem (naprykład, z Gmail abo inšych servisaŭ, nie zakranutych zbojem), mahli b być stračanyja, kali b jany pastupili ŭ sistemu ŭ momant, kali jana jašče nie całkam adnoŭlenaja.
Raniej u karparacyi zajaŭlali, što zroblenyja sproby vypravić situacyju «nie dali čakanaha vyniku».
Što kažuć ekśpierty?
Aŭstralijski ekśpiert pa kibierbiaśpiecy Troj Chant zajaviŭ u kamientary Bi-bi-si, što hety zboj moža mieć dalokasiažnyja nastupstvy.
«Microsoft — najvažniejšaja častka infrastruktury internetu. Toje, što adbyłosia, nahadvaje nam pra toje, nakolki krytyčna važnaj zastajecca elektronnaja pošta. Zboj nie tolki nie daje ludziam pracavać, ale i pieraškadžaje vykonvać inšyja zadačy: uzhadniać sustrečy, rabić pakupki, jakija patrabujuć vieryfikacyi, stvarać akaŭnty abo atrymlivać da ich dostup», — adznačyŭ jon.
Poł Śpiejn z novaziełandskaj kansałtynhavaj kampanii Gorilla Technology dadaŭ, što praź niedastupnaść elektronnaj pošty i inšych servisaŭ kampanii faktyčna «stracili pracoŭny dzień», što «frustravała» karystalnikaŭ.
Ciapier čytajuć
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi43
Kamientary