Pad Minskam pradajuć rezidencyju ź plažam z marskim piaskom i basiejnam, jaki zimoj pieratvarajuć u katok. Kolki prosiać?
U vioscy Tarasava pad Minskam vystavili na prodaž niezvyčajny majontak.
Vioska Tarasava, što znachodzicca na zachad ad Minska, adrazu za kalcavoj darohaj, siońnia viadomaja svajoj katedžnaj zabudovaj. Ale historyja hetaha pasielišča naličvaje bolš za piać stahodździaŭ. Jašče ŭ XVI stahodździ tutejšyja ziemli naležali mahnackamu rodu Astrožskich, a paźniej Tarasava było centram majontka i navat mieła status miastečka.
Za apošnija dziesiacihodździ vioska mocna źmianiłasia. Blizkaść da Minska i zručnyja padjaznyja darohi zrabili Tarasava papularnym miescam dla zaharadnaha žyćcia. Pobač sa starymi damami vyraśli sučasnyja katedžy i vialikija pryvatnyja rezidencyi.
Na aŭtamabili adsiul možna chutka vyjechać na Minskuju kalcavuju darohu ci ŭ bok praśpiekta Pieramožcaŭ. Pajezdka da centra stalicy zajmaje 15‑20 chvilin.
Rezidencyja, jakuju ciapier prapanujuć na Realt.by, znachodzicca na vulicy Bataničnaj. Pavodle pradaŭca, jana tupikovaja, tamu tranzitnaha ruchu tut niama.
Hałoŭny budynak płoščaj 370 kvadratnych mietraŭ maje dva pavierchi, śvietłyja fasady i ciomny dach z šyrokimi vystupami, pad jakimi raźmiaścilisia krytyja terasy. Ich ahulnaja płošča składaje 125 kvadratnych mietraŭ. U domie ŭstalavanyja vialikija panaramnyja vokny z vykarystańniem sistem niamieckaj kampanii Schüco.
Unutry pieravažajuć śvietłyja kolery, naturalnaje dreva i kamień. Kuchnia, stałovaja i haścioŭnia abjadnanyja ŭ adnu prastoru. U kuchonnaj zonie ŭstalavany vialiki bieły vostraŭ z myjkaj, a pobač raźmiaściŭsia abiedzienny stoł ź miakkimi kresłami.
Častka stoli azdoblena draŭlanymi rejkami, pamiž jakimi visiać dekaratyŭnyja śviacilni. Haścioŭnia adździelenaja ad kuchni nievysokaj pieraharodkaj z padśvietkaj. Tut jość televizar i sapraŭdny kamin na drovach.
Asobnaj uvahi zasłuhoŭvaje prastora kala leśvicy. Tut niama pierakryćcia pamiž pieršym i druhim pavierchami, a vialikija vokny raźmieščanyja ŭ dva jarusy. Taki architekturny pryjom nazyvajuć druhim śviatłom. Praz usiu hetuju vysokuju prastoru padymajecca biełaja leśvica sa šklanoj aharodžaj.
Pavodle pradaŭca, dla azdableńnia vykarystoŭvali naturalny kamień z Hrecyi, a ŭ sanvuzłach ustalavali santechniku Villeroy & Boch. U domie čatyry spalni i stolki ž sanvuzłoŭ.
Ale hałoŭnaja asablivaść hetaj nieruchomaści znachodzicca na dvary.
Na ŭčastku płoščaj 20 sotak zrabili vialiki adkryty basiejn pamieram 8 na 12 mietraŭ. Dla dziaciej praduhledžanaja asobnaja zona hłybinioj kala paŭmietra.
Pa krajach ustanoŭlenyja nievialikija fantany. Jość padśvietka i aŭtamatyčnaja sistema cyrkulacyi vady, a pobač, jak śćviardžaje pradaviec, abstalavali plažny kutok z marskim piaskom. U ciopły čas hoda tut možna płavać i adpačyvać na šezłonhach. Uzimku ž, pavodle abjavy, basiejn vykarystoŭvajuć jak katok.
Pobač staić asobny adnapaviarchovy budynak, u jakim raźmiaściŭsia spa-centr płoščaj 80 kvadratnych mietraŭ, dzie jość sauna, džakuzi i pakoj dla zaniatkaŭ johaj. Razam z basiejnam jon utvaraje kompleks ahulnaj płoščaj 176 kvadratnych mietraŭ.
Pobač z vodnym kompleksam abstalavali i miesca dla adpačynku na śviežym pavietry. Pad dacham raźmiaściłasia letniaja kuchnia z abiedziennaj zonaj, dvuma vidami barbiekiu — na adkrytym ahni i na hazie, a taksama kazanom dla płovu. Dla prachałodnych viečaroŭ jość vuličny hazavy abahravalnik.
Adpačyć možna i na adnoj z troch teras, u tym liku kala basiejna, dzie stajać šezłonhi. Asobny kutok adviali dla kureńnia cyhar i nastolnych hulniaŭ. A dla bolš aktyŭnaha baŭleńnia času jość spartyŭnaja placoŭka z baksiorskaj hrušaj. Dzieciam ža dastalisia hulniavy kompleks i batut.
Sam dvor nahadvaje łandšaftny sad. Pamiž pabudovami prakładzienyja darožki, vysadžanyja dekaratyŭnyja travy, kusty i drevy.
Dla aŭtamabilaŭ praduhledžana piać miescaŭ. Na ŭčastku ŭstanoŭlena videanazirańnie, a ŭ žyłym budynku jość hazavaje aciapleńnie i centralnyja kamunikacyi.
Pavodle abjavy, abjekty ŭzvodzilisia ŭ 2020 i 2023 hadach, a apošni ramont pravodzili ŭ 2026-m. Uvieś kompleks prapanujuć całkam hatovym da pražyvańnia.
Za rezidencyju prosiać 9 308 060 rubloŭ, abo kala 3,1 miljona dołaraŭ.
Ciapier čytajuć
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi31
Kamientary