«Cud na Misisipi». U Novym Arleanie tankier sutyknuŭsia z račnym kruiznym sudnam

U Novym Arleanie, štat Łuizijana, tankier sutyknuŭsia z kruiznym sudnam, jakoje stajała kala pryčała na race Misisipi. Na borcie kruiznaha sudna znachodzilisia bolš za 120 pasažyraŭ, usie jany byli vyratavanyja, piša Bi-bi-si.

Adkryvajučy pres-kanfierencyju, mer Novaha Arleana Chielena Marena paviedamiła, što ŭsie pasažyry znojdzienyja, ź ich 32 čałavieki dastaŭlenyja ŭ miascovyja balnicy, ale ni ŭ koha ź ich niama krytyčnych traŭmaŭ.

Mer taksama padziakavała supracoŭnikam usich ekstrannych słužbaŭ za apieratyŭnuju pracu.

Hubiernatar štata Łuizijana Džef Łendry zajaviŭ, što ludziej udałosia vyratavać dziakujučy prafiesijnaj pracy ratavalnikaŭ i miascovych uładaŭ.

«Heta sapraŭdny cud na Misisipi», — skazaŭ jon.

Paśla sutyknieńnia z tankieram sudna lehła na bok i pačało chutka nabirać vadu. Na pieršym etapie ratavalnaj apieracyi z vady byli vyratavanyja prynamsi 14 čałaviek. Na vyratavańnie astatnich pasažyraŭ pajšło mienš za dźvie hadziny.

Jak zajaviła kiraŭnica portavaj palicyi Miełani Mantroł, ekstrannym słužbam udałosia źniać z borta 87 čałaviek, pakul sudna jašče zastavałasia na płavu.

Astatnich pasažyraŭ, jakija apynulisia ŭ vadzie, udałosia raźmierkavać pa ratavalnych šlupkach i katarach na praciahu nastupnych 30—45 chvilin.

Aktyŭny ŭdzieł u likvidacyi nastupstvaŭ sutyknieńnia ŭziała Bierahavaja achova ZŠA.

«Ruch usich sudnaŭ na ŭčastku raki pamiž adznakami 93 i 96 mili pierakryty, pakul ekstrannyja słužby aceńvajuć situacyju i pravodziać nieabchodnyja mierapryjemstvy», — paviedamili Bi-bi-si pradstaŭniki Bierahavoj achovy.

Što viadoma pra kruiznaje sudna

Paciarpiełaje kruiznaje sudna naležyć sudnachodnaj kampanii American Cruise Lines i nazyvajecca American Heritage. Jano było pabudavana ŭ 2015 hodzie, na im prynamsi čatyry pałuby.

Na sajcie kampanii skazana, što sudna moža prymać da 150 haściej i ŭ im raźmieščany restaran, fitnies-centr i try pasažyrskija sałony.

Pavodle źviestak Marine Traffic, daŭžynia tankiera, jaki ŭrezaŭsia ŭ jaho, składaje 160 mietraŭ, što ŭdvaja bolš za daŭžyniu kruiznaha sudna.

Pa słovach mera Novaha Arleana, pasažyry pačali pakidać łajnier, kali jon staŭ iści pad vadu.

Što viadoma pra tankier

Hruzavoje sudna, jakoje sutyknułasia z kruiznym łajnieram, — tankier Atlantic Asphalt.

Zhodna sa źviestkami servisu adsočvańnia sudnaŭ MarineTraffic, jaho maršrut vyhladaŭ nastupnym čynam:

• Z 11 listapada sudna stajała kala pryčała prykładna za 11 marskich mil (20 kiłamietraŭ) nižej pa ciačeńni raki.
• U piatnicu kala 12:20 pa miascovym časie tankier pačaŭ ruch uvierch pa race.
• Prykładna praz hadzinu, kala 13:30 pa miascovym časie, sudna spyniłasia pablizu taho miesca, dzie paśla jaho zaŭvažyli pobač z pryšvartavanym kruiznym łajnieram.

Mer Novaha Arleana Chielena Marena paviedamiła na pres-kanfierencyi, što tankier straciŭ kiravańnie, ale pryčyny hetaha pakul nieviadomyja.

«Vidać, adbyłasia niejkaja niaspraŭnaść rulavoha kiravańnia, — zajaviła kapitan Miełani Biornchem. — Što mienavita stała jaje pryčynaj, my pakul nie viedajem».

Paviedamlajecca, što na miescy zdareńnia znachodziacca śledčyja, rasśledavańnie incydentu praciahvajecca.

Sudziačy sa zdymkaŭ ź miesca padziej, tankier pry sutyknieńni nie paciarpieŭ abo paciarpieŭ niaznačna. Jaho adbuksavali na biaśpiečnuju adlehłaść ad miesca, dzie viaducca ratavalnyja raboty.

• 0
• 0
• 0
• 0
• 0
• 0
• 0
• 0