U Pinsku płanujuć kapitalna adramantavać histaryčny budynak Muzieja Biełaruskaha Paleśsia i całkam abnavić jaho ekspazicyju. Pra heta paviedamili va ŭpraŭleńni kultury Bresckaha abłvykankama, piša BiełTA.
Pinski muziej — adzin z najstarejšych u Biełarusi, jamu bolš za 100 hadoŭ. Jon raźmiaščajecca ŭ budynku jezuickaha kalehiuma XVII stahodździa, jaki źjaŭlajecca pomnikam architektury i maje status historyka-kulturnaj kaštoŭnaści.
Nieabchodnaść abnaŭleńnia muzieja ŭžo naśpieła. Prajektna-kaštarysnaja dakumientacyja padrychtavanaja i prajšła ekśpiertyzu. Raboty pačnucca ŭ 2026 hodzie, pieršapačatkova płanujecca častkova adramantavać dach. Na trecim paviersie budynka ciapier pracuje dziciačaja chareahrafičnaja škoła, ale na čas ramontu jaje vychavancy buduć zajmacca ŭ inšych pamiaškańniach. Paśla zaviaršeńnia rabot muziej zojmie ŭsie pavierchi.
Padčas rekanstrukcyi zamieniać inžyniernyja kamunikacyi, vokny i dźviery, vykanajuć ramont dachu, fasada i ŭnutranych pamiaškańniaŭ. Dla zachavańnia histaryčnaha abličča budynka buduć vykarystoŭvać adpaviednyja materyjały. Finansavać raboty budzie abłasny biudžet.
Va ŭpraŭleńni kultury adznačyli, što muziej maje značnuju kulturnuju i architekturnuju kaštoŭnaść. U jahonych fondach i ekspazicyi zachoŭvajucca ŭnikalnyja pradmiety, niekatoryja ź jakich isnujuć u Biełarusi ŭ adzinym ekzemplary.
Ciapierašniaja ekspazicyja znajomić naviednikaŭ z historyjaj Paleśsia ad staražytnych časoŭ da pačatku XX stahodździa. U muziei možna ŭbačyć kaštoŭnyja archieałahičnyja i histaryčnyja artefakty, a taksama daviedacca pra žyćcio i zaniatki palešukoŭ u roznyja epochi.
Ciapier čytajuć
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi5757
Kamientary