SpaceX admoviłasia ad sproby złavić nižniuju stupień rakiety Starship, ale jašče moža pasprabavać złavić vierchniuju

SpaceX admoviłasia ad sproby złavić nižniuju stupień rakiety Starship padčas čarhovaha vyprabavalnaha pusku, piša Bi-bi-si.

Nižniuju stupień płanavałasia złavić z dapamohaj miechaničnych ruk na startavaj viežy, jakija mnohija paraŭnoŭvali z pałačkami dla ježy. Zamiest hetaha stupień była skiravanaja ŭ akijan i ŭpała tudy.

Vierchniaja stupień rakiety praciahvaje palot u kosmas.

SpaceX prymie rašeńnie pra toje, ci budzie jana sprabavać złavić jaje, prykładna a 15:15 pa miascovym časie (23:15 pa Minsku) u subotu.

Heta pieršaja sproba całkam viarnuć abiedźvie stupieni rakiety Starship. Pavodle zadumy stvaralnikaŭ, ich možna budzie vykarystoŭvać paŭtorna i tym samym źnizić košt zapuskaŭ.

Rakieta vyšynioj 124 m paśpiachova startavała sa startavaj placoŭki Starbase u Boka-Čyka (štat Techas) a 22:45 pavodle Hrynviča ŭ piatnicu.

Zapusk tranślavaŭsia ŭ pramym efiry. Havoračy pra admovu ad sproby złavić nižniuju stupień, pradstaŭnik SpaceX skazaŭ: «Biaśpieka — heta zaŭsiody pryjarytet numar adzin. Kali my apraboŭvajem toje, čaho raniej nie rabili, to pryjarytetam dla nas źjaŭlajecca ŭpeŭnienaść u tym, što kožny manieŭr možna vykanać biaśpiečna».

Vierchniaja stupień Starship pavinna vyvieści na arbitu 26 spadarožnikaŭ, jakija papoŭniać suzorje Starlink. Jana ablacić Ziamlu 14 razoŭ i vierniecca praz 22,5 hadziny paśla zapusku.

Na hetym etapie jaje mohuć pasprabavać złavić z dapamohaj miechaničnych ruk na startavaj viežy (rašeńnie pra heta budzie pryniata paźniej).

Padčas troch papiarednich puskaŭ SpaceX udavałasia złavić nižniuju stupień. Vierchniaja stupień dahetul zaŭsiody pryvadniałasia ŭ akijanie.

SpaceX daŭno imkniecca stvaryć rakietu, całkam prydatnuju dla paŭtornaha vykarystańnia. U rakiety Falcon 9 možna paŭtorna vykarystoŭvać nižniuju stupień. Hetuju rakietu zapuskajuć bolš za 100 razoŭ na hod, i paŭtornaje vykarystańnie bustaraŭ dazvoliła značna skaracić vydatki.

Za skaračeńniem vydatkaŭ pilna sočać akcyjaniery SpaceX — kampanija sioleta stała publičnaj, — a taksama NASA.

Pośpiechi Starship niepasredna paŭpłyvajuć na płany NASA vysadzić čałavieka na Miesiac u 2028 hodzie. Heta vielmi ambicyjny termin.

Pry hetym u SpaceX jość kankurent — kampanija Blue Origin miljardera Džefa Biezasa, jakaja taksama zaklučyła kantrakt z NASA na raspracoŭku aparata dla pasadki na Miesiac.

NASA stavić pierad saboj takija ambicyjnyja terminy praz supiernictva z Kitajem, jaki płanuje vysadzić svaich tajkanaŭtaŭ na Miesiac u 2030 hodzie, kazaŭ administratar ahienctva Džared Ajziekman.

• 0
• 0
• 0
• 0
• 0
• 0
• 0
• 0