«Pradavać kvitki pa pašparcie pakul niemahčyma». U Teatry lalek prakamientavali ažyjataž na kvitki

Dziciačyja śpiektakli taksama nie adstajuć pa zapaŭnialnaści zały: jak minimum da 7 studzienia na ŭsiu afišu nie zastałosia nivodnaha volnaha miesca, piša Onliner.by.

Tym nie mienš teatrały praciahvajuć dziažuryć na sajcie, kab za ličanyja siekundy paśpieć nabyć kvitok, i budujuć teoryi zmovy, maŭlaŭ, ažyjataž štučny, a ŭsie miescy zahadzia raźmierkavanyja pamiž «svaimi».

Paśla čarhovaj chvali abureńniaŭ u sacyjalnych sietkach padrabiaznyja kamientaryi nakont situacyi ŭ efiry ANT dała hałoŭny administratar teatra Alena Kazakova. Pavodle jaje słoŭ, ciapier Teatr lalek pieražyvaje pik papularnaści — pakazčyki naviedvalnaści vyraśli jak minimum u dziesiać razoŭ.

— Dla akcioraŭ heta kamplimient, dla administracyi — prablema. Uvieś teatr pra heta havoryć, my pieražyvajem za situacyju, jakaja skłałasia.

«Hałodnyja hulni», u jakich davodzicca ŭdzielničać u sprobach złavić kvitok, u teatry źviazvajuć najpierš ź nievialikaj kolkaściu pasadačnych miescaŭ u zale. 236 kresłaŭ u maštabach Minska — heta mała. Adnak pašyrać prastoru abo pieranosić pastanoŭki na inšyja placoŭki administracyja nie płanuje.

«Śpiektakli buduć hublać svaju mastackuju kaštoŭnaść», — patłumačyła Alena Kazakova.

Ciapier kvitki pastupajuć u prodaž biez papiaredniaha anonsu. Usio dla taho, kab sajt ź imi nie «loh» jašče da źjaŭleńnia miescaŭ u prodažy. Zvyčajna ŭ tak zvany «dzień iks» sajt šturmujuć bolš za 20 tysiač čałaviek.

Jak adznačyła Kazakova, prodažy adkryvajucca pa miery hatoŭnaści techničnaj słužby, i kali heta adbudziecca, nie viedajuć navat sami kasiry i administratary.

— My prychodzim na pracu jak zvyčajna, i ŭ niejki momant nam prosta dajuć start.

Adzin z samych papularnych sposabaŭ vyrašeńnia prablemy, jaki prapanujuć biełarusy ŭ sacyjalnych sietkach, — istotna pavysić ceny. Adnak rabić hetaha ŭ teatry pakul nie źbirajucca — «z pavahi da hledačoŭ».

Pradavać kvitki pa pašparcie taksama pakul niemahčyma, pakolki heta nie praduhledžana zakanadaŭstvam.

Jašče adno balučaje pytańnie — pierakupščyki, jakija pradajuć kvitki ŭ niekalki razoŭ daražej za pieršapačatkovy košt. Pavodle słoŭ Kazakovaj, ź imi viadziecca aktyŭnaja baraćba.

— My źviarnulisia ŭ HUUS. Pravodziłasia pravierka, viedaju, što takija ludzi byli ŭstanoŭlenyja i pryciahnutyja da adkaznaści. Jość vykazvańni nakont taho, što [da pieraprodažu kvitkoŭ] maje dačynieńnie sam teatr. Heta vielmi niepryjemna. My sapraŭdy nie majem da hetaha nijakaha dačynieńnia.

• 0
• 0
• 0
• 0
• 0
• 0
• 0
• 0