Džej Dzi Vens moža admovicca ad udziełu ŭ nastupnych prezidenckich vybarach

Na palityčnyja pierśpiektyvy Vensa paŭpłyvali niadaŭniaja paraza respublikancaŭ na vybarach u Kanhres, rekordna nizki ŭzrovień padtrymki Trampa siarod amierykancaŭ i vajna ź Iranam, jakaja praciahvajecca. Akramia taho, Vens razvažaje, jak sumiaścić svaje prezidenckija ambicyi z raskołam u ruchu MAGA («Zrobim Amieryku znoŭ vialikaj»), sfarmavanym Trampam, i siamiejnymi abstavinami: letam u jaho naradziłasia čaćviortaje dzicia.

Pavodle krynic CNN, Vens chacieŭ by adnavić adzinstva ŭ MAGA, jakoje dapamahło jamu i Trampu pieramahčy na vybarach 2024 hoda. Adnak jon nie ŭpeŭnieny, što mienavita jamu varta ŭznačalić hety ruch. Adzin ź jahonych blizkich paplečnikaŭ adznačyŭ, što nie ździvicca lubomu rašeńniu vice-prezidenta. Vensu ciapier 42 hady, tamu jon jašče zmoža viarnucca ŭ vialikuju palityku paźniej, kali palityčnaja situacyja budzie bolš spryjać jaho pośpiechu.

Adnoj z hałoŭnych pieraškod dla prezidenckich ambicyj Vensa jahonyja paplečniki ličać vajnu ź Iranam. Adzin ź ich zajaviŭ CNN, što kali kanflikt nie zavieršycca, šancaŭ na pieramohu na vybarach 2028 hoda moža nie być ni ŭ adnaho kandydata ad respublikancaŭ.

Paśla źjaŭleńnia pieršych vynikaŭ vybaraŭ u Kanhres Vens zajaviŭ, što respublikancy paciarpieli parazu mienavita praź iranski kanflikt. Jon napisaŭ, što vajna stała pryčynaj niaŭdačy partyi i što respublikancy stracili kantrol nad Sienatam jak minimum na šeść hadoŭ. Vens taksama pryznaŭ, što krytyki vajny mieli racyju.

Niekatoryja jahonyja prychilniki ŭbačyli ŭ hetych zajavach sprobu dystancyjavacca ad vajennaj apieracyi i sfarmulavać ułasnuju pazicyju napiaredadni mahčymaj prezidenckaj kampanii. Pavodle surazmoŭcaŭ The Washington Post, Vens dobra razumieje prablemy administracyi Trampa, ale raźličvaje, što situacyja moža źmianicca paśla ŭzmacnieńnia pazicyj demakrataŭ u Vašynhtonie. Adzin ź jahonych paplečnikaŭ adznačyŭ, što dva hady ŭ palitycy — vielmi praciahły termin, i ciapierašnija abstaviny jašče mohuć źmianicca.

Publičnaja zajava Vensa pra pryčynu parazy respublikancaŭ vyklikała razdražnieńnie Trampa, paviedamlaje CNN. 12 listapada prezident adchiliŭ vice-prezidenta ad pieramoŭ ź Iranam, jakimi toj zajmaŭsia apošnim časam. Raniej paviedamlałasia, što Vašynhton i Tehieran padrychtavali papiaredniaje mirnaje pahadnieńnie, jakoje praduhledžvała ŭzajemnyja sastupki.

Tramp zajaviŭ u svajoj sacyjalnaj sietcy Truth Social, što ZŠA nie patrebnaja ździełka ź Iranam, a Vens ciapier budzie zajmacca vykryćciom karupcyi ŭ haradach i štatach, jakimi kirujuć demakraty.

Prezident kansiervatyŭnaj arhanizacyi American Principles Project Tery Šylinh ličyć, što Vensu było b pamyłkaj admovicca ad udziełu ŭ vybarach ź mierkavańniaŭ palityčnaj metazhodnaści. Pavodle jaho, vice-prezident faktyčna ŭžo hatovy ŭziać na siabie rolu lidara pierad adnoj z najbujniejšych palityčnych bitvaŭ.

Tym časam da mahčymaj prezidenckaj kampanii ŭžo rychtujucca i inšyja respublikancy. Siarod ich — hubiernatar Fłarydy Ron Desantys, sienatar ad Techasa Ted Kruz i hubiernatar Džordžyi Brajan Kiemp.

Raniej Vens i Marka Rubia ličylisia asnoŭnymi patencyjnymi kandydatami na źmienu Trampu, adnak sam prezident publična nie addavaŭ pieravahi nivodnamu ź ich. Pavodle infarmacyi haziety The Washington Sun, Rubia moža nieŭzabavie pakinuć pasadu dziaržsakratara, kab padrychtavacca da ŭdziełu ŭ prezidenckaj kampanii 2028 abo 2032 hoda.

• 0
• 0
• 0
• 0
• 0
• 0
• 0
• 0