«Spytali, ja žyvaja ci nie». Biełaruski bjuć tryvohu: im telefanujuć ź milicyi i raspytvajuć pra trup
Biełaruski dzielacca ŭ sacsietkach, što im telefanujuć ź milicyi, kab vyśvietlić, ci ŭsio ź imi ŭ paradku. Usio b ničoha, ale žančyny niepakojacca: ci nie mohuć heta akazacca machlary? Praskokvajuć u abanientaŭ i inšyja strachi: «Na pracy napałochali, što takim čynam źbirajuć hałasy dla ŠI, a ja nie chaču».
Dyk jak zrazumieć, telefanuje sapraŭdy milicyja ci nie?
«U niadzielu viečaram zvanok ź nieznajomaha numara — adkazvaju. Nazyvajuć majo proźvišča, imia i imia pa baćku, pradstaŭlajucca supracoŭnikam RAUS (nie pačuła adździeł i imia) i pytajuć, ci ŭsio ŭ mianie dobra, bo ŭ Viciebskaj vobłaści znajšli nieapaznany trup»;
«Mnie telefanavali, spytali, žyvaja ci nie, vybačylisia, što napałochali. Heta byŭ RAUS»;
«Mnie telefanavali z takim samym pytańniem miesiacy dva tamu i taksama pa hetaj ža spravie», — dziasiatki padobnych apoviedaŭ možna sustreć u sacsietkach ad biełarusak z roznych kutkoŭ krainy.
Supracoŭniki milicyi sapraŭdy pačali pravodzić takija apytańni paśla taho, jak u krasaviku hetaha hoda ŭ lesie ŭ Lepielskim rajonie znajšli trup nieviadomaj žančyny. Usio, što było viadoma dla aryjenciroŭki: zahinułaj mahło być ad 18 da 40 hadoŭ, rost kala 170 sm. Mierkavałasia, što śmierć nastupiła ciaham hoda.
Z ulikam takoj uzrostavaj raźbiežki ŭ apisanych prykmietach pad pošuki trapiła vialikaja vybarka žycharak krainy, tamu ich apytańnie dahetul nie skončanaje. Jak i dahetul nie apaznany toj samy trup.
U suviazi ź vialikim abjomam pracy abzvonami zajmajucca nie tolki supracoŭniki ź Viciebskaj vobłaści, dzie adbyłasia trahiedyja. Heta tłumačyć, čamu pazvanić mohuć nie tolki z hetaha rehijona.
Niekalki žančyn, jakija pieražyvali nakont taho, ci praŭda ich turbavali ź milicyi, u vyniku vyrašyli naŭprost pierazvanić u orhany — im paćvierdzili, što milicyja sapraŭdy takim čynam praciahvaje vieści pošuki asoby achviary.
«Mnie ŭčora zvanili, ja sieła na paniku. Pazvaniła tamu ŭ 102 sama, pradyktavała numar, jany pravieryli i skazali, što mnie realna zvaniŭ ich supracoŭnik», — padzialiłasia svaim dośviedam karystalnica Alina.
Heta sapraŭdy adzin ź dziejsnych sposabaŭ paćvierdzić, kamu ž sapraŭdy naležyć numar, ź jakoha vam dazvanilisia. Da taho ž, u samoj milicyi nahadvajuć: supracoŭniki nikoli nie buduć vyviedvać u vas uraźlivuju infarmacyju, takuju jak, naprykład, numar bankaŭskaj kartki. Nie dašluć jany vam i sms ci spasyłki. Nie nabiaruć vas i z vajbiera z zamiežnaha numara.
«U mianie nie prasili nijakich dakumientaŭ. Tolki kali ja niešta daviedajusia pa temie źnikłaj žančyny, kab paviedamiła ŭ MUS».
«I mnie telefanavali, nijakich danych nie prasili, patłumačyli, čamu telefanujuć i spytali, ci ŭsio dobra sa mnoj i blizkimi», — padzialiłasia jašče niekalki biełarusak u Threads.
Ciapier čytajuć
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi5858
Kamientary