SpaceX upieršyniu ŭ historyi złaviła vierchni błok Starship VIDEA

Karabiel Starship kampanii Iłana Maska SpaceX paśla 22‑hadzinnaha vyprabavalnaha palotu pa arbicie ŭpieršyniu ździejśniŭ pasadku z dapamohaj zachopu manipulatarami na startavaj placoŭcy, piša VVS. 

Karabiel byŭ padchopleny miechaničnymi «rukami»-manipulatarami na startavaj viežy ŭ 16:16 pavodle ŭschodniaha standartnaha času ZŠA (u 00:16 pavodle minskaha času).

SPACEX HAS JUST CAUGHT STARSHIP! This is the first-ever catch of an orbital-class upper stage spacecraft that has gone to orbit, survived reentry, and returned for recovery by the tower's chopsticks. CONGRATS @SpaceX!!! https://t.co/GPEAwVPJzv

— Nic Cruz Patane (@niccruzpatane) November 14, 2026

Padčas tranślacyi pasadki hučała pieśnia Baby Come Back («Dzietka, viarnisia») hurta Player.

«Heta byŭ Śviaty Hraal kaśmičnych palotaŭ. My złavili Starship, i ciapier usio źmienicca», — skazaŭ pradstaŭnik SpaceX Den Chuot.

Rakieta vyšynioj 124 mietry paśpiachova startavała z kasmadroma Starbase u Boka-Čyka (štat Techas) u piatnicu ŭ 22:45 pavodle Hrynviča.

Jak paviedamiła kampanija SpaceX, padčas palotu karabiel vyvieŭ na arbitu 26 internet-spadarožnikaŭ dla papaŭnieńnia sistemy Starlink.

Raniej SpaceX admoviłasia ad sproby złavić nižniuju stupień rakiety Starship padčas vyprabavalnaha zapusku.

Nižniuju stupień płanavałasia złavić z dapamohaj miechaničnych «ruk» na startavaj viežy, jakija mnohija paraŭnoŭvali z pałačkami dla ježy. Zamiest hetaha stupień nakiravali ŭ akijan, dzie jana i ŭpała.

Heta pieršaja sproba całkam viarnuć abiedźvie stupieni rakiety Starship. Pavodle zadumy raspracoŭščykaŭ, ich možna budzie vykarystoŭvać paŭtorna i takim čynam źnizić košt zapuskaŭ.

Zapusk tranślavaŭsia ŭ pramym efiry. Kamientujučy admovu ad sproby złavić nižniuju stupień, pradstaŭnik SpaceX skazaŭ: «Biaśpieka — heta zaŭsiody pryjarytet numar adzin. Kali my vypraboŭvajem toje, čaho raniej nie rabili, dla nas hałoŭnaje — być upeŭnienymi, što kožny manieŭr možna vykanać biaśpiečna».

Padčas troch papiarednich zapuskaŭ SpaceX udavałasia złavić nižniuju stupień. Vierchniaja stupień dahetul zaŭsiody pryvodniałasia ŭ akijanie.

SpaceX daŭno imkniecca stvaryć rakietu, całkam prydatnuju dla paŭtornaha vykarystańnia. U rakiety Falcon 9 možna paŭtorna vykarystoŭvać nižniuju stupień. Hetuju rakietu zapuskajuć bolš za 100 razoŭ na hod, i paŭtornaje vykarystańnie paskaralnikaŭ dazvoliła značna skaracić vydatki.

Za skaračeńniem vydatkaŭ uvažliva sočać akcyjaniery SpaceX — sioleta kampanija stała publičnaj, — a taksama NASA.

Pośpiechi Starship niepasredna paŭpłyvajuć na płany NASA vysadzić čałavieka na Miesiac u 2028 hodzie. Heta vielmi ambicyjny termin.

Pry hetym u SpaceX jość kankurent — kampanija Blue Origin miljardera Džefa Biezasa, jakaja taksama zaklučyła kantrakt z NASA na raspracoŭku aparata dla pasadki na Miesiac.

NASA stavić pierad saboj takija ambicyjnyja terminy praz supiernictva z Kitajem, jaki płanuje vysadzić svaich tajkanaŭtaŭ na Miesiac u 2030 hodzie, kazaŭ kiraŭnik ahienctva Džared Ajziekman.

• 0
• 0
• 0
• 0
• 0
• 0
• 0
• 0