Avijacyjnyja rehulatary ZŠA źniali zabaronu na vylety z usich aeraportaŭ krainy, jakaja dziejničała kala čatyroch hadzin u suviazi z prablemami ŭ dyśpietčarskaj sistemie suviazi. Heta pryviało da admieny i zatrymak tysiač avijarejsaŭ.
Fota: Adam Gray/Getty Images
Za čas dziejańnia zabarony było admieniena 4 700 rejsaŭ i zatrymana jašče 10 000, piša Bi-bi-si.
Jak paviedamiŭ ministr transpartu ZŠA Šon Dafi, amierykanskija avijacyjnyja ŭłady spynili paloty va ŭsich aeraportach krainy ŭ suviazi z «kamunikacyjnymi prablemami, jakija zakranuli ŭsie rehijanalnyja centry kiravańnia pavietranym rucham».
Pavodle źviestak amierykanskaha partniora Bi-bi-si, CBS, jaki spasyłajecca na mnostva krynic, prypynieńnie vyletaŭ było abumoŭlena abnaŭleńniem pryvatnaj sietki suviazi, jakaja złučaje dyśpietčarskija vuzły ŭ ZŠA.
Apierataram hetaj sistemy źjaŭlajecca L3Harris, paviedamlaje CBS. U vyniku abnaŭleńnia jana pačała pierazahružacca, a potym abrynułasia.
Na svaim sajcie L3Harris nazyvaje siabie «elitnym pravajdaram» kamunikacyjnych sistem dla samych raźvitych pavietranych prastor, zbrojevych sistem i sistem kamandavańnia i kiravańnia ŭ śviecie. Na prośbu Bi-bi-si ab kamientary ŭ kampanii nie adkazali.
Pavodle źviestak telekampanii CNN, jakaja spasyłajecca na danyja sajta ATC.com, prynamsi ŭ niekatorych rajonach ZŠA centry kiravańnia pavietranym rucham całkam stracili mahčymaść padtrymlivać suviaź z samalotami.
«Heta nie novaje 11 vieraśnia»
Ministr unutranaj biaśpieki ZŠA Markuejn Malin paviedamiŭ žurnalistam, što toje, što adbyłosia, nie źviazana ź jakim-niebudź napadam na ZŠA. «Heta telekamunikacyjnyja pieraboi. Miescaznachodžańnie ŭsich samalotaŭ vyznačana», — zajaviŭ jon.
Jon dadaŭ, što «ŭsie znachodziacca ŭ biaśpiecy» i zapeŭniŭ, što toje, što adbyvajecca, nie źjaŭlajecca «novym 11 vieraśnia».
Pry hetym Malin nahadaŭ, što apošni raz usie paloty ŭ ZŠA byli spynieny paśla napadu 11 vieraśnia 2001 hoda.
Ministr taksama adznačyŭ, što incydent z avijacyjnym rucham nie źviazany z hłabalnymi pierabojami na siervierach kampanii Microsoft, jakija ŭ tym liku pieraškadžali pracy imiejł-klijenta Outlook, servisu videakanfierencyj Teams i ŠI-čat-bota Copilot.
Jak adznačajuć karespandenty Bi-bi-si, Malin pryznaŭ, što amierykanskija ŭłady pakul nie viedajuć, što mienavita vyklikała pieraboi ŭ pracy avijacyjnych kamunikacyj. Jon zajaviŭ, što pakul niama nijakich śviedčańniaŭ, što adbyŭsia jaki-niebudź napad, adnak dadaŭ, što «nie moža ničoha vyklučyć».
Amierykanskija sistemy kiravańnia pavietranymi palotami vielmi sastareli.
U minułym hodzie Kanhres ZŠA vydzieliŭ 12,5 młrd dalaraŭ na ich abnaŭleńnie, adnak dla hetaha nieabchodnyja značna bolšyja inviestycyi.
Niekalki tydniaŭ tamu FAA paabiacała da kanca 2028 hoda zamianić sistemy, praca jakich usio jašče zaležyć ad hnutkich dyskaŭ — nośbitaŭ infarmacyi, jakija ŭžyvalisia ŭ 1980‑ch i 1990‑ch hadach.
Ciapier čytajuć
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi5858
Kamientary