Amierykanskija inžyniery raspracavali sistemu, jakaja tušyć ahoń biez vady, pieny i chimičnych rečyvaŭ. Zamiest ich vykarystoŭvajucca hukavyja chvali, jakija čałaviek navat nie čuje. Jak pracuje hetaja technałohija, raskazvaje CNN.
Kab padtrymlivać hareńnie, ahniu patrebnyja try rečy: haručaje rečyva, vysokaja tempieratura i kisłarod. Kali prybrać chacia b adnu ź ich, połymia zhaśnie.
U adroźnieńnie ad zvyčajnych sistem pažaratušeńnia, jakija vykarystoŭvajuć vadu, amierykanskaja kampanija Sonic Fire Tech prapanuje ŭździejničać na ahoń hukavymi chvalami. Jany parušajuć pastupleńnie kisłarodu da połymia, bieź jakoha hareńnie niemahčyma.
Dla hetaha inžyniery stvaryli hienieratar, jaki vypracoŭvaje mahutnyja hukavyja chvali častatoj nižej za 20 hiercaŭ. Takija vahańni nazyvajucca infrahukam. Čałaviečaje vucha ich zvyčajna nie ŭsprymaje, ale jany zdolnyja prymušać pavietra ruchacca.
Pavodle raspracoŭščykaŭ, hukavyja chvali vyklikajuć chutkija vahańni pavietra kala połymia, pieraškadžajučy pastupleńniu kisłarodu ŭ zonu hareńnia. U vyniku ahoń zhasaje, choć kancentracyja kisłarodu va ŭsim pamiaškańni zastajecca raniejšaj.
Sam pryncyp viadomy nie pieršy hod. Jaho vyvučali amierykanskija vajennyja daśledčyki, a ŭ 2015 hodzie studenty Univiersiteta Džordža Miejsana stvaryli kampaktnuju pryładu, zdolnuju tušyć nievialikaje połymia hukam.
Adnak pakul efiektyŭnaść takoha sposabu paćvierdžanaja pieravažna na nievialikich uzharańniach, kali hukavyja chvali nakiroŭvajuć niepasredna na ahoń ź blizkaj adlehłaści. Ci atrymajecca hetak ža nadziejna spyniać vialikija pažary, jašče treba dakazać.
Ci zamienić huk vadu?
Sonic Fire Tech prapanuje ŭstaloŭvać akustyčny hienieratar u budynku, a hukavyja chvali raźmiarkoŭvać pa pamiaškańniach praź śpiecyjalnyja kanały, padobnyja da vientylacyjnych.
Sistema pavinna ŭklučacca aŭtamatyčna, kali datčyki vyjaŭlajuć prykmiety ŭzharańnia. Raspracoŭščyki raźličvajuć, što heta dazvolić spyniać pažar na samym pačatku.
Zvyčajnyja aŭtamatyčnyja sistemy pažaratušeńnia spracoŭvajuć, kali tempieratura dasiahaje peŭnaha ŭzroŭniu. Tady śpiecyjalnyja raspylalniki pačynajuć padavać vadu, jakaja tušyć ahoń, ale adnačasova moža paškodzić meblu, techniku i azdableńnie pamiaškańniaŭ.
Hukavaja sistema takoj prablemy nie maje. Jaje možna zapuskać pry pieršych prykmietach niebiaśpieki, nie bajučysia, što pamyłkovaja tryvoha skončycca zatapleńniem pakoja.
Asabliva pierśpiektyŭnym raspracoŭščyki ličać vykarystańnie infrahuku pry ŭzharańni aleju i tłušču na kuchni. Takija pažary niebiaśpiečna tušyć vadoj: jana moža vyklikać burnaje raspyrskvańnie raspalenaha tłušču i raspaŭsiudžvańnie połymia.
Adnak u novaj technałohii jość istotny niedachop — vysokaja cana. Pavodle acenak kampanii, abstalavańnie doma płoščaj kala 325 kvadratnych mietraŭ abydziecca prykładna ŭ $30 tysiač.
Da taho ž sistema pakul nie prajšła ŭsich nieabchodnych vyprabavańniaŭ. Śpiecyjalisty pa pažarnaj biaśpiecy nahadvajuć, što tradycyjnyja vodnyja sprynklery ŭžo dakazali svaju efiektyŭnaść, a hukavoj technałohii jašče treba paćvierdzić nadziejnaść u realnych umovach.
Tym nie mienš jaje ŭžo pačynajuć ukaraniać. Kampanija atrymała niekalki dazvołaŭ na ŭstanoŭku abstalavańnia ŭ Kalifornii i raspačała mantaž pieršaj sistemy ŭ pryvatnym domie. Paralelna inžyniery daśledujuć mahčymaść vykarystańnia infrahuku dla tušeńnia pryrodnych pažaraŭ.
Pieršyja aficyjnyja vyprabavańni dla siertyfikacyi płanavałasia pačać vosieńniu 2026 hoda, a atrymać adpaviedny siertyfikat raspracoŭščyki raźličvajuć u 2027-m.
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi6464
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi64
Što znajšli ŭ viaźnicy Kreŭskaha zamka, dzie ŭ 1382‑m zadušyli Kiejstuta? Jana była pachavanaja pad zavałami paśla šturmu Śvidryhajły amal 600 hadoŭ44
Kamientary