Šrajbman: Paśla vajny va Ukrainie Rasija moža adpravić svaje vojski ŭ Biełaruś

Rasijskich vajskoŭcaŭ sustrakajuć u Biełarusi. Studzień 2023 hoda. Fota: Kanstancin Bialaŭski / «Vajar»

Na dumku Arcioma Šrajbmana, paśla zakančeńnia vajny Rasieja moža zachavać značnuju častku svajho vojska i vykarystoŭvać Biełaruś dla jaho raźmiaščeńnia. Pry hetym havorka nieabaviazkova idzie ab padrychtoŭcy novaha nastupu.

«Kali ŭ Rasii pa vyniku hetaj vajny zastaniecca mahčymaść padtrymlivać mabilizacyjny patencyjał i hetuju armiju, jakuju jany nie zachočuć adrazu demabilizavać, uvieś miljon puskać u Rasieju, jaje treba nakiravać kudyści», — kaža analityk.

Rasiejskich vajskoŭcaŭ mohuć adpravić u Biełaruś dla vučeńniaŭ, adpačynku abo adnaŭleńnia. Takim čynam Maskva zmoža praciahvać stvarać napružanaść na ŭschodnim fłanhu NATO navat paśla spynieńnia bajavych dziejańniaŭ, miarkuje Šrajbman.

Adnak mahčyma raźvićcio padziej i ŭ bolš pazityŭnym klučy, bo razam sa skančeńniem vajny źnikaje ryzyka, što Biełaruś budzie ŭ jaje ŭciahnutaja.

«Heta moža dazvolić navat (Alaksandru) Łukašenku bałansavać trochi aktyŭniej, čym jon bałansuje siońnia. My možam pabačyć bolšyja sastupki pa palitviaźniach, my možam pabačyć bolšyja sastupki pa rečach, jakija byli zabłakavanyja praz vajnu».

Ahułam, jak budzie raźvivacca situacyja dla Biełarusi, vielmi zaležyć ad taho, ci praciahnie Maskva svaju ahresiŭnuju palityku paśla vajny. Kali tak, to ničoha dobraha dla Biełarusi i jaje suvierenitetu być nie moža.

«Ale kali raźliki rasijskaj ułady źmianiajucca, i jana ličyć, što ŭsio, my nadarvalisia, ci chopić zajmacca hetym prynamsi na dziesiacihodździ, — heta akno mažlivaściaŭ dla biełaruskaj niezaležnaści, dla biełaruskaha suvierenitetu. Tamu što navat biełaruskaja ciapierašniaja ŭłada, lubaja biełaruskaja ŭłada zmoža dazvolić sabie bolš u situacyi kali ni Rasieja, ni Ukraina, ni zachodnija susiedzi, nie ŭsprymajuć jaje jak vajenny płacdarm», — padkreślivaje surazmoŭca.

Dla ekanomiki Biełarusi drennyja naviny

Zakančeńnie vajny moža prynieści Biełarusi i ekanamičny spad. Ciapier biełaruskija pradpryjemstvy atrymlivajuć zakazy, źviazanyja z patrebami rasiejskaj vajennaj pramysłovaści. Paśla vajny hetyja dachody mohuć skaracicca, a zachodnija sankcyi suprać Biełarusi — zachavacca.

«Moža atrymacca takaja pastka, kali dehraduje rasiejski VPK, ale sankcyi nie źniatyja, i krynicy rostu dla biełaruskaj ekanomiki nie vidavočnyja. Užo ciapier rost rost vielmi maleńki — kala 2%.

Dumaju, heta taja časovaja pastka, jakuju Łukašenka, darečy, choča pieraduchilić, i mnie zdajecca, hetym taksama vyklikany jahony dypłamatyčny aktyvizm apošniaha hoda — paŭtara hadoŭ», — kaža Šrajbman.

Akramia taho, Rasieja moža skaracić ekanamičnuju padtrymku Biełarusi, pakolki taja pierastanie adyhryvać takuju važnuju rolu ŭ zabieśpiačeńni vajskovych patrebaŭ Maskvy. Pavodle apošnich zajavaŭ Łukašenki analityk zrabiŭ vysnovu, što idealnym scenaram dla palityka było b astyvańnie stasunkaŭ na rasiejskim viektary, ale adradžeńnie jeŭrapiejskaha kirunku.

Što Łukašenka moža prapanavać, akramia kavy?

Pakul vajna nie skončana Łukašenku znoŭ prapanuje zrabić Miensk placoŭkaj mirnych pieramoŭ pa Ukrainie, a taksama ŭdzielničać u ich. Šrajbman miarkuje, što palityk sprabuje paŭtaryć pośpiech 2014‑2015 hadoŭ, kali pieramovy ŭ Miensku dapamahli jamu vyjści ź mižnarodnaj izalacyi.

Adnak ciapier u Łukašenki niama pierakanaŭčych arhumientaŭ na karyść praviadzieńnia pieramovaŭ u Biełarusi. Isnujuć inšyja placoŭki — naprykład, Turcyja, Aŭstryja abo Šviejcaryja.

Šrajbman taksama sumniavajecca, što biełaruskija ŭłady zmohuć prapanavać udzielnikam pieramovaŭ niešta istotnaje:

«Što moža pakłaści (na stoł pieramovaŭ) Alaksandr Ryhoravič, akramia kavy, kali heta prachodzić u Miensku? Voś heta vialikaje pytańnie, na jakoje ŭ jaho zaraz niama adkazu».

Pry hetym Biełaruś moža praciahvać udzielničać u techničnych i humanitarnych pracesach, naprykład, u arhanizacyi abmienaŭ pałonnymi abo viartańnia hramadzianskich.

«Łukašenka padklučycca, kali treba budzie niešta arhanizavać technična na ziamli, ale dla hetaha nie treba siadzieć u pakoi (padčas pieramovaŭ)», — reziumuje Arciom Šrajbman.

• 0
• 0
• 0
• 0
• 0
• 0
• 0
• 0