Nakolki dobra dzicia budzie spać unačy, vyznačajecca jašče da naradžeńnia. I budučaja maci moža na heta paŭpłyvać

Novanarodžanyja jašče nie adroźnivajuć dzień ad nočy tak, jak darosłyja. Jany śpiać karotkimi pieryjadami, rehularna pračynajučysia, u tym liku dla karmleńnia. Pastupova bolšaja častka snu pačynaje prypadać na načny čas.

Ale kali nasamreč pačynaje farmiravacca hety rytm? Jak piša Neue Zürcher Zeitung (NZZ), navukoŭcy sa šviejcarskaha Univiersiteta Frybura vyrašyli vyśvietlić, ci možna zaŭvažyć jaho jašče da naradžeńnia dziciaci i jak jon źviazany sa snom maci.

U daśledavańni ŭdzielničali 32 ciažarnyja žančyny. U trecim trymiestry jany nasili śpiecyjalnyja datčyki, jakija na praciahu jak minimum piaci dzion rehistravali ich ruchalnuju aktyŭnaść i tempieraturu cieła, a taksama ruchi płoda.

Tak navukoŭcy mahli vyznačyć, u jaki čas sutak budučaje dzicia było bolš aktyŭnym, a kali znachodziłasia ŭ stanie spakoju.

Paśla naradžeńnia nazirańni praciahnuli. Baćki viali dziońniki snu i zapaŭniali ankiety, kali dzieciam było niekalki tydniaŭ, try miesiacy i paŭhoda.

Vyjaviłasia, što rytm aktyŭnaści dziciaci da naradžeńnia źviazany ź jaho budučym režymam snu. Tyja niemaŭlaty, jakija jašče va ŭłońni maci byli bolš spakojnymi ŭnačy, čaściej zachoŭvali schilnaść da načnoha snu i paśla źjaŭleńnia na śviet. Hetaja suviaź prasočvałasia navat va ŭzroście šaści miesiacaŭ.

Čamu važny son budučaj maci

Navukoŭcy taksama vyjavili, što režym snu ciažarnaj žančyny źviazany z tym, jak u jaje dziciaci farmirujecca čarhavańnie dnia i nočy.

U maci, jakija kłalisia spać i pračynalisia prykładna ŭ adzin i toj ža čas, dzieci čaściej mieli bolš vyraznuju schilnaść spać unačy.

Pry hetym havorka nie abaviazkova pra rańni adychod da snu ci stroha vosiem hadzin adpačynku. Daśledčyki źviartali ŭvahu najpierš na rehularnaść: nakolki mała adroźnivaŭsia čas zasynańnia i abudžeńnia ad adnaho dnia da nastupnaha.

Reč u tym, što ŭnutranyja bijałahičnyja hadzińniki dziciaci pačynajuć pracavać jašče da naradžeńnia. Va ŭłońni maci jany źviazanyja z rytmami jaje arhanizma, jakija mohuć dapamahać dziciaci prystasoŭvacca da čarhavańnia dnia i nočy.

Takim čynam, rehularny son padčas ciažarnaści moža spryjać farmiravańniu ŭ dziciaci bolš ustojlivaha sutačnaha rytmu.

Adnak heta nie aznačaje, što niemaŭla budzie spać usiu noč biez abudžeńniaŭ. Dla maleńkich dziaciej načnyja pračynańni narmalnyja, i bolš vyraznaje adroźnieńnie dnia ad nočy nie admianiaje patreby ŭ karmleńni i inšych asablivaściaŭ rańniaha raźvićcia.

Jość i inšaja važnaja ahavorka. U daśledavańni ŭdzielničali tolki 32 pary maci i dziciaci, tamu jaho vyniki jašče treba paćvierdzić na bolšaj kolkaści siemjaŭ. Da taho ž navukoŭcy vyjavili suviaź, ale pakul nie dakazali, što mienavita rehularny son maci staŭ pryčynaj lepšaha načnoha režymu ŭ dziaciej.

Tym nie mienš praca pakazvaje, što zvyčki budučaj maci mohuć mieć značeńnie dla farmiravańnia dziciačaha snu zadoŭha da naradžeńnia.

• 0
• 0
• 0
• 0
• 0
• 0
• 0
• 0