U Turavie źbirajucca za dva miljony rekanstrujavać nievialiki most cieraz kanał
U Turavie pačynajuć rychtavacca da homielskich abłasnych «Dažynak», jakija projduć tam u 2027 hodzie. Pakul kantrolnyja orhany praviarajuć mahčymyja prypiski pry ŭparadkavańni Kalinkavičaŭ da sioletniaha fiestyvalu, u Turavie ŭžo płanujuć pieršyja budaŭničyja raboty, piša «Fłahštok».

Pieršuju značnuju sumu źbirajucca vydatkavać na rekanstrukcyju nievialikaha mosta praz kanał. Jon złučaje Zamkavuju haru na terytoryi staražytnaha haradzišča ź vioskaj Zapiasočča.
Na hetyja raboty z rajonnaha biudžetu płanujuć vydzielić da 2 miljonaŭ 120 tysiač rubloŭ, što składaje kala 707 tysiač dalaraŭ. U toj ža čas kapitalny ramont padobnaha mosta nad Lebiadzinaj sažałkaj u homielskim parku kaštavaŭ udvaja mienš.

Pry hetym prajekta rekanstrukcyi turaŭskaha mosta pakul niama, tamu dakładna nieviadoma, jak mienavita jaho źbirajucca źmianić. Zhodna z prykładzienym kaštarysam, u kanstrukcyi novaha mosta buduć vykarystanyja jak žalezabietonnyja elemienty, tak i draŭlanyja ščyty.
Ciapier pradpryjemstva «Žytkavicki kamunalnik» vybiraje padradnuju arhanizacyju dla budaŭniča-mantažnych rabot. Pačać ich płanujuć užo ŭ śniežni. U studzieni—sakaviku raboty prypyniać, a ŭ krasaviku adnoviać.
Zaviaršyć rekanstrukcyju miarkujuć u vieraśni 2027 hoda — napiaredadni praviadzieńnia «Dažynak».
Kamientary