Rakietam «Petryjot» niestaje śpiecyjalnaj viskozy: niečakany deficyt na suśvietnym rynku
ZŠA chočuć rezka naraścić vytvorčaść rakiet Patriot, ale sutyknulisia ź niečakanaj pieraškodaj — deficytam śpiecyjalnaj viskoznaj tkaniny. Zamianić jaje, jak piša The Wall Street Journal, pakul niama čym.

Viskoza zvyčajna asacyjujecca z adzieńniem, ale jaje asablivuju raznavidnaść vykarystoŭvajuć i ŭ rakietnych ruchavikach. Paśla termičnaj apracoŭki tkanina pieratvarajecca ŭ vuhlarodny materyjał, zdolny vytrymlivać tempieratury ŭ tysiačy hradusaŭ.
Im pakryvajuć unutranuju pavierchniu sopła, praź jakoje vychodziać raspalenyja hazy. Achoŭny płast pastupova abharaje, ale nie daje ruchaviku razburycca ad pierahrevu.
Dla najnoŭšych rakiet-pierachopnikaŭ PAC-3 MSE amierykanskich kompleksaŭ Patriot pakul dazvoleny da vykarystańnia tolki adzin taki materyjał. Jaho vyrablaje francuzskaja kampanija ArianeGroup, a amierykanskaja Park Aerospace nanosić na tkaninu śpiecyjalnuju smału, pierš čym jana traplaje da vytvorcaŭ rakietnych ruchavikoŭ.
Łancužok pastavak pačynajecca ŭ Čechii, dzie vyrablajuć viskoznaje vałakno. U Francyi ź jaho robiać termaŭstojlivuju tkaninu, jakuju zatym adpraŭlajuć na apracoŭku ŭ ZŠA.
Adnak ArianeGroup nie moža chutka pavialičyć vypusk. U kampanii jość i inšyja zakazčyki, u tym liku francuzskija vajskoŭcy, a najaŭnych mahutnaściaŭ niedastatkova, kab zadavolić uvieś popyt.
Jak ZŠA stracili ŭłasnuju vytvorčaść
Raniej ZŠA sami vyrablali viskozu dla rakietnych ruchavikoŭ. Ale ŭ kancy XX stahodździa adpaviednyja pradpryjemstvy zakrylisia. Adny praź finansavyja ciažkaści, inšyja praz ekałahičnyja prablemy. U vyniku amierykanskaj abaronnaj pramysłovaści daviałosia pierajści na jeŭrapiejskija materyjały.
Heta častka šyrejšaj prablemy. Paśla zakančeńnia chałodnaj vajny ZŠA skaracili vajskovyja vydatki, a abaronnyja pradpryjemstvy masava abjadnoŭvalisia abo spyniali pracu. Kolkaść hałoŭnych padradčykaŭ u amierykanskaj aerakaśmičnaj i abaronnaj pramysłovaści skaraciłasia z 51 da piaci.
Paśla pačatku poŭnamaštabnaj vajny va Ukrainie, a zatym i vajny z Iranam popyt na rakiety dla SPA rezka vyras. Ich niedachop užo adbiŭsia na mahčymaściach Ukrainy abaraniacca ad rasijskich udaraŭ.
Kab papoŭnić zapasy, Pientahon płanuje da kanca 2030 hoda pavialičyć vytvorčaść najnoŭšych rakiet Patriot bolš jak utraja — prykładna da dźviuch tysiač za hod. Adnak dla hetaha niedastatkova prosta pašyryć rakietnyja zavody. Pavialičyć vypusk pavinny i sotni pastaŭščykoŭ asobnych detalaŭ i materyjałaŭ. Kali choć adzin ź ich nie spravicca, heta moža zatarmazić usiu vytvorčaść.
Jak ZŠA sprabujuć pieraadoleć deficyt
Amierykanskaja kampanija Park Aerospace ŭžo vydatkavała 5 miljonaŭ dalaraŭ na pašyreńnie vytvorčaści śpiecyjalnaj viskozy ŭ Francyi. Novaja linija pavinna zapracavać u 2028 hodzie, ale navat jaje mahutnaściaŭ budzie niedastatkova. Tamu francuzskaja ArianeGroup płanuje pabudavać jašče adzin zavod u ZŠA — prykładna da 2030 hoda.
Paralelna amierykanskija vytvorcy šukajuć alternatyŭnych pastaŭščykoŭ. Adnak zamianić materyjał niaprosta: najmienšy defiekt u rakietnym ruchaviku moža pryvieści da zboju, tamu novaja tkanina pavinna prajści vyprabavańni, jakija mohuć zaniać hady.
Adnym z mahčymych pastaŭščykoŭ ličycca niamieckaja kampanija Enka. Jaje asnoŭny biznes — vytvorčaść viskozy dla adzieńnia — mocna paciarpieŭ paśla pandemii, kali ludzi stali čaściej pracavać z domu i mienš kuplać dziełavyja kaściumy.
Kampanija źbirałasia zakryć zavod, adnak Pientahon i amierykanskija abaronnyja padradčyki harantavali zakupki, jakija dazvolili praciahnuć jaho pracu. Praŭda, pakul tolki da 2028 hoda. Da taho ž materyjał Enka jašče nie prajšoŭ usich vyprabavańniaŭ dla vykarystańnia ŭ najnoŭšych rakietach Patriot.
Takim čynam, navat kali ZŠA znojduć dadatkovyja srodki i pašyrać rakietnyja zavody, chutka likvidavać deficyt pierachopnikaŭ nie atrymajecca.
Kamientary