Ekanomika

Mihranty ŭsio radziej jeduć u bahatyja krainy. I heta moža stać prablemaj dla tych krain

Paśla niekalkich hadoŭ mihracyjnaha bumu ŭ raźvitych krainach nazirajecca rezkaje skaračeńnie prytoku mihrantaŭ. Čamu tak adbyvajecca i da jakich nastupstvaŭ moža pryvieści, tłumačyć Financial Times.

Palicejskija nazirajuć za mihrantami, jakija siadajuć u nievialikuju łodku, kab pasprabavać dabracca da Vialikabrytanii. Mała-le-Ben, poŭnač Francyi, 8 krasavika 2026 hoda. Fota: Jean-Francois Badias / AP

Jašče niadaŭna mihracyja ŭ bahatyja krainy dasiahała rekordnych maštabaŭ. Paśla pandemii tudy masava jechali zamiežnyja rabotniki i studenty, a kolkaść achvotnych pierasialicca praciahvała raści. Adnak za apošnija dva hady situacyja rezka źmianiłasia: prytok mihrantaŭ pačaŭ skaračacca, pryčym navat u krainach, jakija tradycyjna byli najbolš pryvabnymi dla pierajezdu.

Maštab pieramien pakazvajuć śviežyja danyja Arhanizacyi ekanamičnaha supracoŭnictva i raźvićcia (AESR). U 2025 hodzie prytok zamiežnikaŭ na pastajannaje žycharstva skaraciŭsia ŭ 25 z 37 krain arhanizacyi. U cełym jon źmienšyŭsia na 1,6% paśla padzieńnia amal na 5% hodam raniej. Kali ž nie ŭličvać Ispaniju, Partuhaliju i Italiju, dzie mihracyja praciahvała raści, skaračeńnie ŭ 2025 hodzie dasiahnuła 8%.

Asabliva prykmietna kolkaść novych mihrantaŭ źmienšyłasia ŭ Vialikabrytanii, Hiermanii i Kanadzie — krainach, jakija doŭhi čas byli adnymi z hałoŭnych kirunkaŭ pierajezdu. Źnižajecca i kolkaść zamiežnych studentaŭ: paśla pika ŭ 2,1 miljona čałaviek u 2023 hodzie ich prytok u krainy AESR skaraciŭsia da 1,6 miljona.

Praŭda, heta jašče nie aznačaje, što śviet nadoŭha ŭvajšoŭ u epochu nizkaj mihracyi. U mnohich krainach pryjezd zamiežnikaŭ pa-raniejšamu pieravyšaje dapandemijny ŭzrovień. Častka ekanamistaŭ ličyć, što ciapier adbyvajecca viartańnie da bolš zvyčajnych pakazčykaŭ paśla vyklučnaha paślapandemijnaha bumu. Ale palityčnyja rašeńni mohuć zrabić spad značna bolš praciahłym.

Čamu krainy pačali začyniać dźviery

Prytok mihrantaŭ dapamoh mnohim ekanomikam pieraadoleć niedachop pracoŭnych ruk, ale adnačasova abvastryŭ prablemy, da jakich krainy akazalisia nie hatovyja. U asobnych haradach stała ciažej znajści dastupnaje žyllo, vyrasła nahruzka na miedycynu i hramadskija pasłuhi. Heta ŭzmacniła niezadavolenaść vybarščykaŭ i padšturchnuła ŭrady da bolš žorstkaj mihracyjnaj palityki.

Pakazalny prykład — Kanada, jakaja paśla pandemii rezka pavialičyła pryjom zamiežnych rabotnikaŭ i studentaŭ. Nasielnictva chutka rasło, ale ekanamičnyja pakazčyki nie aznačali takoha ž chutkaha palapšeńnia dabrabytu. Z 2019 pa 2026 hod kanadski VUP pavialičyŭsia amal na 13%, tady jak u raźliku na adnaho žychara — tolki na 2,3%. Adnačasova ŭzmacniŭsia cisk na rynak žylla i sistemu achovy zdaroŭja.

U vyniku kanadskija ŭłady pačali skaračać mihracyjnyja kvoty i abmiažoŭvać pryjom zamiežnych studentaŭ. Padobnyja miery prymaje Aŭstralija, a Vialikabrytanija značna ŭskładniła atrymańnie niekatorych pracoŭnych viz i prava na stałaje žycharstva. U jeŭrapiejskich krainach taksama ŭzmacniajucca patrabavańni da tych, chto prosić prytułku, i pašyrajecca praktyka viartańnia ludziej, jakim u im admovili.

Uzmacnieńnie abmiežavańniaŭ, vidać, upłyvaje i na mihracyju pa nielehalnych maršrutach. Pavodle AESR, u 2025 hodzie kolkaść zajaŭ na prytułak pa-za ZŠA skaraciłasia bolš čym na piatuju častku, a ŭ Jeŭrasajuzie zafiksavali prykładna na tracinu mienš vypadkaŭ niezakonnaha pierasiačeńnia miežaŭ.

Čamu skaračeńnie mihracyi moža doraha abyścisia

Adnak u žorstkaj mihracyjnaj palityki jość i advarotny bok. Nasielnictva bolšaści bahatych krain imkliva stareje: ludziej piensijnaha ŭzrostu stanovicca bolš, a tych, chto pracuje i płacić padatki, — adnosna mienš. U takich umovach mihracyja ŭžo stała adnoj z hałoŭnych krynic papaŭnieńnia pracoŭnaj siły.

Maštab zaležnaści pakazvajuć demahrafičnyja prahnozy AAN. Kali b mihracyja całkam spyniłasia, da 2060 hoda kolkaść ludziej pracazdolnaha ŭzrostu ŭ Hiermanii, Francyi i Ispanii była b bolš čym na 10% mienšaj, čym u bazavym prahnozie. U Vialikabrytanii i ZŠA roźnica składała b kala 20%, a ŭ Kanadzie — bolš za 30%.

Heta aznačaje nie tolki niedachop supracoŭnikaŭ u kampanijach. Skaračeńnie kolkaści pracazdolnych ludziej abmiažoŭvaje padatkovyja pastupleńni, za košt jakich dziaržavy finansujuć piensii, miedycynu i inšyja pasłuhi. Pry hetym vydatki na padtrymku starejšaha nasielnictva buduć raści. Tamu ŭradam daviadziecca chutčej pravodzić piensijnyja reformy, pavyšać pradukcyjnaść pracy abo šukać dadatkovyja krynicy dachodaŭ.

Mihracyja moža palehčyć hetuju nahruzku, ale nie vyrašyć prablemu nazaŭsiody. Pryjezdžyja taksama starejuć i z časam atrymlivajuć piensii. Adnak pakolki ludzi zvyčajna pierajazdžajuć u pracazdolnym uzroście, na praciahu peŭnaha času jany, jak praviła, płaciać u biudžet bolš, čym atrymlivajuć ź jaho. Heta daje dziaržavam čas na nieabchodnyja reformy.

Ale rost kolkaści rabotnikaŭ i padatkovych pastupleńniaŭ jašče nie aznačaje, što žychary krainy abaviazkova stanuć bahaciejšymi. Mihracyja zvyčajna dapamahaje pavialičvać ahulny VUP, adnak jaje ŭpłyŭ na VUP u raźliku na adnaho čałavieka, jaki lepš adlustroŭvaje siaredni ŭzrovień ekanamičnaha dabrabytu, značna mienš adnaznačny.

Šmat što zaležyć ad taho, jakuju pracu vykonvajuć pryjezdžyja. Kvalifikavanyja śpiecyjalisty dapamahajuć zapaŭniać vakansii ŭ miedycynie, inžynieryi i technałahičnych kampanijach. A mihranty, jakija pracujuć u śfiery dohladu za dziećmi i pažyłymi ludźmi, dazvalajuć inšym, u tym liku vysokakvalifikavanym žančynam, praciahvać prafiesijnuju dziejnaść.

Razam z tym chutki prytok ludziej moža stvarać dadatkovyja ciažkaści. Kali budaŭnictva žylla, raźvićcio transpartu i hramadskich pasłuh nie paśpiavajuć za rostam nasielnictva, jakaść žyćcia paharšajecca. Da taho ž mihranty niaredka pracujuć na pasadach nižejšych za svaju kvalifikacyju, a vizavyja praviły mohuć pieraškadžać im znachodzić lepšuju pracu.

Jość i mienš vidavočny efiekt. Kali pradpryjemstvy mohuć lohka najmać nizkaapłatnych rabotnikaŭ, u ich moža słabieć stymuł inviestavać u aŭtamatyzacyju. U vyniku ekanomika raście pieravažna za košt pavieličeńnia kolkaści zaniatych, a nie taho, što kožny rabotnik vyrablaje bolš.

Dźviery začyniajuć nie dla ŭsich

Na hetym fonie mihracyjnaja palityka stanovicca ŭsio bolš vybaračnaj. Urady imknucca abmiežavać pryjezd nizkakvalifikavanych rabotnikaŭ i ludziej bieź nieabchodnych dazvołaŭ, ale adnačasova sprabujuć pryciahvać inžynieraŭ, navukoŭcaŭ, IT-śpiecyjalistaŭ i inšych vysokakvalifikavanych prafiesijanałaŭ. Dla ich stvarajuć asobnyja vizavyja prahramy i spraščajuć pracedury pierajezdu.

Asabliva prykmietnaje supiarečańnie ŭźnikaje ŭ ZŠA. Amierykanskaja technałahičnaja industryja ŭ značnaj stupieni raźvivałasia dziakujučy śpiecyjalistam ź inšych krain, ale ciapier ułady prapanujuć uskładnić atrymańnie papularnych siarod ich pracoŭnych viz H-1B i abmiažoŭvajuć mahčymaści pracaŭładkavańnia dla zamiežnych vypusknikoŭ. Miž tym prykładna tracina ludziej z doktarskaj stupieńniu ŭ pryrodaznaŭčych i techničnych navukach u ZŠA — uradžency inšych krain, jakija atrymali adukacyju ŭ samich Štatach.

Ad bolš žorstkich amierykanskich praviłaŭ mohuć vyjhrać inšyja dziaržavy. Univiersitety Hiermanii, Irłandyi i Italii ŭžo adznačajuć rost kolkaści zamiežnych studentaŭ na fonie abmiežavańniaŭ u tradycyjna papularnych anhłamoŭnych krainach. Dla jeŭrapiejskich ekanomik heta mahčymaść pryciahnuć maładych śpiecyjalistaŭ, jakija paśla vučoby mohuć zastacca pracavać.

A dla niekatorych krain uzmacnieńnie mihracyjnych abmiežavańniaŭ moža aznačać viartańnie ŭłasnych rabotnikaŭ abo pryjezd tych, chto raniej płanavaŭ pierajechać dalej. Tak, u Mieksicy častka mihrantaŭ, jakija źbiralisia trapić u ZŠA, ciapier vyrašaje zastacca, a niekatoryja viartajucca z Amieryki. Jany mohuć vykarystoŭvać nabyty pracoŭny dośvied, uładkoŭvacca na miascovyja pradpryjemstvy abo adkryvać ułasnuju spravu.

Dla Mieksiki, nasielnictva jakoj taksama stareje, heta moža stać dadatkovaj padtrymkaj ekanomiki. Pavodle daśledavańnia Banka Ispanii, pryśviečanaha ekanomicy Łacinskaj Amieryki, viartańnie mihrantaŭ moža zabiaśpiečyć da dvuch dadatkovych pracentnych punktaŭ rostu VUP Mieksiki na dušu nasielnictva da 2028 hoda.

Kamientary

Ciapier čytajuć

Ci pahražaje Krymu błakada praz paralizavany Krymski most?14

Ci pahražaje Krymu błakada praz paralizavany Krymski most?

Usie naviny →
Usie naviny

Jak u kino. U centry Hrodna 19‑hadovy chłopiec z adnaho ŭdaru pavaliŭ słup13

Śviet na parozie finansavaha abvału, jašče bolš ahresiŭny Tramp i niebiaśpieka dla Tajvania. The Economist daŭ prahnoz na 2027 hod13

Žančynie, jakaja arhanizavała ŭ Minsku niezaležnuju kulturnuju prastoru, dali piać hadoŭ kałonii18

Samaja tannaja kvatera — 222 tysiačy rubloŭ. MAPID prapanavaŭ kvatery ŭ «Soniečnym» dla ŭsich achvotnych5

46‑hadovaha minskaha psichołaha i biznes-treniera pasadzili pa palityčnaj spravie2

Prezident Manholii, jaki try tydni tamu sustrakaŭsia z Łukašenkam, padaŭ u adstaŭku, abvinavačany ŭ karupcyi1

U Hiermanii małady biełarus uščent raskałaciŭ furu ab aŭtadom piensijanieraŭ. Kiroŭcaŭ ratavali z dapamohaj viertalotaŭ

Rasijskija i łukašenkaŭskija ŚMI dahetul nie paviedamili pra rujnavańnie Krymskaha mosta7

Ceny na nieruchomaść pajšli ŭniz. Pryčym nie tolki ŭ Minsku13

bolš čytanych navin
bolš łajkanych navin

Ci pahražaje Krymu błakada praz paralizavany Krymski most?14

Ci pahražaje Krymu błakada praz paralizavany Krymski most?

Hałoŭnaje
Usie naviny →

Zaŭvaha:

 

 

 

 

Zakryć Paviedamić