«Ramantavać budzie składaniej, čym budavać z nula». Ci mahčyma chutka adnavić Krymski most?
Zachodnija ekśpierty ličać, što Krymski most, pabudavany za 3,5 miljarda dołaraŭ i zadumany jak adzin ź simvałaŭ kiravańnia Uładzimira Pucina, moža nadoŭha, a mahčyma, i nazaŭsiody, zastacca razburanym, piša The Moscow Times.

U vyniku ŭkrainskaha ŭdaru ŭ noč na 17 listapada, padčas jakoha vykarystoŭvalisia bieśpiłotniki «Palanycia», a taksama rakiety «Nieptun» i «Fłaminha», asnoŭny pralot mosta atrymaŭ katastrafičnyja paškodžańni. Pra heta vydańniu Bi-bi-si paviedamiŭ prafiesar strukturnaj inžynieryi aŭstralijskaha Univiersiteta Monaša Kolin Kaprani.
Pavodle jaho słoŭ, mietaličnaja arka vyšynioj z 15‑paviarchovy budynak abrynułasia ŭ vadu razam z darožnym pałatnom i častkaj apornych kanstrukcyj.
Ekśpiert ličyć, što most faktyčna całkam źniščany. Kaprani adznačyŭ, što ramont u takich umovach moža akazacca składaniejšym za budaŭnictva novaha mosta. Pad vadoj znachodzicca mnostva abłomkaŭ, a paškodžańni mahli zakranuć apory i padmurak. Akramia taho, častku kanstrukcyj, jakija zachavalisia, daviadziecca całkam demantavać, pierš čym pačynać adnaŭlenčyja raboty.
Mietaličnuju arku aŭtamabilnaha pralota vahoj kala piaci tysiač ton vyrabiŭ zavod «Voroniežstalmost». Jaje vytvorčaść pačałasia ŭ mai 2016 hoda, a ŭstanoŭka na apory zaviaršyłasia tolki ŭ kastryčniku 2017-ha. Praz paŭhoda Pucin asabista adkryŭ ruch pa moście, prajechaŭšy pa im za rulom hruzavika KAMAZ razam ź miljarderam Arkadziem Ratenbierham, čyja kampanija zajmałasia budaŭnictvam.
Analityk finskaj daśledčaj hrupy Black Bird Group Emil Kastechielmi miarkuje, što aŭtamabilnuju častku mosta nie adnoviać da zakančeńnia vajny. Pavodle jaho acenki, Ukraina dasiahnuła pieramohi z kankretnymi i simvaličnymi nastupstvami: zabieśpiačeńnie Kryma apynułasia pad pahrozaj, a abłomki mosta pieraškodzili sudnachodstvu ŭ Kierčanskim pralivie.
Francuzski vajskovy analityk Kleman Malen ličyć, što Krym faktyčna akazaŭsia izalavanym ad Rasii. Dla zabieśpiačeńnia paŭvostrava zastajecca suchaputny kalidor — trasa R-280 «Navarosija». Adnak jana rehularna padviarhajecca atakam bieśpiłotnikaŭ. Pa słovach Malena, z pačatku hoda ŭkrainskija drony siaredniaj dalokaści parazili sotni rasijskich hruzavikoŭ. Dla abarony trasy rasijskija vajskoŭcy raźmiaścili tam tysiačy sałdat, jakija niasuć słužbu na apošnim rubiažy supraćpavietranaj abarony i vykarystoŭvajuć kulamioty, ustanoŭlenyja na pikapach.
Jašče adzin šlach zabieśpiačeńnia — paromnaja pieraprava. Ale ŭkrainskija bieśpiłotniki nieadnarazova atakavali i jaje. Kastechielmi adznačaje, što nieviadoma, kolki paromaŭ zastałosia ŭ rasparadžeńni Rasii.
Kierč-Jenikalski kanał, u jaki abrynułasia arka mosta, źjaŭlajecca adzinym sudnachodnym šlacham pamiž Azoŭskim i Čornym morami. Praź jaho ekspartavałasia da 25% usiaho rasijskaha zbožža, nahadvaje hienieralny dyrektar kampanii «Savekon» Andrej Sizaŭ.
Sudnachodstva ŭ Kierčanskim pralivie spynienaje ź lipienia 2026 hoda na fonie atak bieśpiłotnikaŭ. Ciapier jaho adnaŭleńnie taksama pad pytańniem. Pavodle acenki Sizava, rasčystka kanała ad abłomkaŭ moža zaniać ad adnaho da troch miesiacaŭ. Dla paraŭnańnia jon pryvodzić abvał pralota mosta ŭ amierykanskim Bałtymory ŭ 2024 hodzie: tady na adnaŭleńnie sudnachodstva pa race Patapska spatrebiłasia prykładna stolki ž času.
Vajskovy ekśpiert i były aficer Armii abarony Izraila Ihal Levin sumniavajecca, što Rasija ŭvohule budzie adnaŭlać Krymski most. Na jaho dumku, heta nie maje sensu, pakolki abjekt znachodzicca ŭ zonie dasiažnaści ŭkrainskich rakiet i bieśpiłotnikaŭ, a rasijskaja sistema supraćpavietranaj abarony nie zmahła efiektyŭna abaranić jaho.
Levin taksama ličyć, što savieckija sistemy SPA sastareli i ŭžo nie adpaviadajuć sučasnym pahrozam. Jon źviartaje ŭvahu na šyroki arsienał uzbrajeńniaŭ, jaki vykarystoŭvajecca siońnia: ad bujnych sistem nakštałt FP-5 i kryłatych rakiet «Nieptun» da šmatlikich nievialikich i mabilnych bieśpiłotnikaŭ.
Ci pahražaje Krymu błakada praz paralizavany Krymski most?
Zialenski raskazaŭ, čym ukraincy padbili Krymski most
Zialenski, a taksama ŭ Kramli prakamientavali ŭdar pa Krymskim moście
Rasijskija i łukašenkaŭskija ŚMI dahetul nie paviedamili pra rujnavańnie Krymskaha mosta
Krymski most zrujnavany ŭdaram ukrainskich rakiet
Kamientary