Statkievič pra Cichanoŭskaha: Ty patrebny Biełarusi. Viartajsia da siabie chutčej, hieroj
Mikałaj Statkievič u svaim telehram-kanale, dzie vykazvajecca pra svaich paplečnikaŭ, vykazaŭsia pra Siarhieja Cichanoŭskaha.

«Siarhiej Cichanoŭski — lidar pratestaŭ 2020 hoda i były palitviazień — uziaŭ udzieł u akcyi salidarnaści ź niezaležnymi biełaruskimi vydaviectvami ŭ vyhnańni i ich čytačami, a taksama pradstaviŭ tut svaju aŭdyjoviersiju adnaho z frahmientaŭ majoj knihi «I heta ŭsio ŭ tabie».
Zaraz šmat chto pniecca ŭ «lidary». Ale, na žal, u najnoŭšaj palityčnaj historyi Biełarusi sapraŭdnych alternatyŭnych lidaraŭ było vobmal. Lidar — heta toj, chto viadzie za saboj inšych, nie zvažajučy na pieraškody i ryzyku dla siabie. A tut usio bolš pałachlivyja imitatary albo rachmanyja «prahmatyki». Siarhiej pa svaich jakaściach — sapraŭdny lidar. Tamu i byŭ previentyŭna niejtralizavany. Jon hodna vytrymaŭ vyprabavańni i katavańni turemnaha piekła. I prachodzić zaraz vielmi składanaje vyprabavańnie viartańniem u volnaje žyćcio.
Piać hadoŭ być vykraślenym ź jaho, žyć pa naviazanych praviłach, amal u poŭnaj izalacyi ad blizkich i śvietu, a potym viarnucca ŭ hety śviet, dzie za piać hod źmianilisia nie tolki technałohii i palityčnaja situacyja, ale źmianilisia i ludzi, jakich viedaŭ raniej, — sapraŭdy vielmi składana.
Niekatoryja źmieny ciažka pryniać, kali samyja blizkija ludzi, zmušanyja prystasoŭvacca da situacyi bieź ciabie, mianiajuć svoj ład žyćcia, i hety novy ład niezvarotna mianiaje nie tolki ich, ale i vašyja stasunki. Z takim ciažka źmirycca, kali taho, što dapamahała trymacca stolki hod, užo nie isnuje. Ale heta nieabchodna pryniać, treba šukać novyja sensy i apiryščy.
Ja spadziajusia, što ŭ ciabie atrymajecca, Siarhiej. Ty patrebny Biełarusi. Viartajsia da siabie chutčej, hieroj!» — napisaŭ Mikoła Statkievič.
Kamientary