Dačakałasia z vojska i pajechała ź im u rejs. Pad Starymi Darohami zahinuła maładaja para z Babrujska
21‑hadovy Nazar viarnuŭsia z vojska ŭsiaho za try tydni da avaryi. Jany z 19‑hadovaj Valeryjaj pačali žyć razam, źbiralisia pažanicca i pajechać na mora. U apošni rejs dziaŭčyna adpraviłasia ź im, bo nie chacieła pakidać adnaho ŭ dalokaj darozie. Ich pachavajuć pobač.

Nazar i Valeryja Osipava zahinuli ranicaj 14 listapada ŭ Staradarožskim rajonie. Ich mikraaŭtobus Mercedes, jaki jechaŭ u bok Babrujska, sutyknuŭsia łob u łob z hruzavikom toj ža marki. Zahinuŭ taksama 54‑hadovy kiroŭca hruzavika.

Pra maładych ludziej maci Valeryi Julija Osipava raskazała Komkur.info.
Pra śmierć dački jana daviedałasia ad śledčaha.
«Patelefanavaŭ śledčy i spytaŭ: «Valeryja Osipava — vaša dačka?» Kažu, tak. Jon: «Zdaryłasia niaščaście. U Starych Darohach jany z chłopcam raźbilisia». Ja skazała, što heta niapraŭda, i kinuła słuchaŭku. Potym užo brat pravieryŭ infarmacyju, i my pajechali tudy», — raskazała žančyna.
Ź miesca avaryi rodnyja nakiravalisia ŭ Słuck, kudy pryvieźli cieły zahinułych.
Nazar i Lera paznajomilisia dva hady tamu, niezadoŭha da jaho pryzyvu na terminovuju słužbu. Słužyŭ chłopiec u Babrujsku.

«Usie hetyja paŭtara hoda Lera jaho ciarpliva čakała, kožny dzień nasiła «smačnieńkaje», ličyła dni da dembiela», — uspaminaje maci.
Nazar demabilizavaŭsia 24 kastryčnika. Para pačała žyć razam.
Chłopiec uładkavaŭsia kiroŭcam na Wildberries i kupiŭ sabie aŭtamabil.
Valeryja, pavodle maci, zarablała z 14 hadoŭ. Jana skončyła kursy naroščvańnia paviek, a paźniej adkryła ŭłasny kaśmietyčny kabiniet.

«Tak chacieła chutčej stać samastojnaj», — kaža Julija.
U apošniuju pajezdku para vypraviłasia ŭ piatnicu, 13 listapada. Zahruzilisia ŭ Babrujsku, pajechali ŭ Słuck. Tam zrabili dva rejsy, a pad ranicu rušyli dadomu.
«Lera pajechała, bo nie chacieła pakidać Nazara adnaho ŭ dalokaj darozie. Vielmi kachała. Źbiralisia pažanicca i pajechać na mora. Jak baluča ŭśviedamlać, što ŭsio ŭ adzin momant abarvałasia…» — raskazała maci.
Raźvitańnie z Nazarom i Valeryjaj projdzie ŭ Babrujsku 17 listapada.
Maładych ludziej pachavajuć na mohiłkach pobač.
Ciapier čytajuć
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał
Kamientary