«Што маглі, тое рабілі»: Нікандрава сышла з Агенцтва па інвестыцыях і прыватызацыі
Наталля Нікандрава сышла з пасады дырэктаркі Нацыянальнага агенцтва па інвестыцыях і прыватызацыі, пра гэта яна паведаміла ў сваім фэйсбуку.
Нікандрава працавала на гэтым месцы цягам трох гадоў, адзначылася, у тым ліку, і вострымі словамі на адрас эканамічнай палітыкі дзяржавы.
Чытайце: Нікандрава: «Стратныя прадпрыемствы — ліквідаваць, міністэрствы — скараціць, на высокія пасады — маладых» — гутарка з чыноўніцай
Як сказала экс-дырэктарка «Нашай Ніве», сыход адбыўся па асабістых прычынах.
«Пакуль незразумела, хто будзе замест мяне. Мінэканомікі шукае чалавека, але мне здаецца, што трэба шукаць у МЗС», — дадала Нікандрава і расказала, што атрымалася зрабіць за час работы.
«Што маглі, тое рабілі. Самае галоўнае — мы сфармавалі давер да гэтага дзяржаўнага інстытута. Прыемна, калі хтосьці звяртаўся да нас, пачынаючы словамі «вас параіла такая-та кампанія». Бо калі інвестар прыходзіць у іншую краіну, то ён як сляпое кацяня тут. Яны ішлі да нас, мы дапамагалі, балелі іх праблемамі, ціснулі на мясцовыя ўлады ў шэрагу выпадкаў. Канечне, не было дастаткова паўнамоцтваў — мы маглі толькі сігналізаваць пра нейкія праблемы, пісаць прапановы. Але ці ляжа гэта ў падмурак нейкіх законаў? Гэта ад нас не залежала», — сказала Нікандрава.
Нейкія рэчы, спадзяецца яна, атрымаецца рэалізаваць на новым месцы — Наталля стала сузаснавальніцай і старшынёй фонда развіцця «Новая эканамічная стратэгія» ды анансуе «шмат цікавых ідэй».
Цяпер чытаюць
Выйшаў на свабоду беларус, якога ў свой час прысудзілі да пажыццёвага зняволення. Гэта першы вядомы такі выпадак9
Каментары