«Мыцца не вадзілі, на шпацыр трапіла адзін раз». Дзяўчына, якую затрымалі за прагулку з белым парасонам, — пра сваю пятую адсідку
Пасля 25 сутак на волю выйшла Юлія Міхайлава, якую затрымалі за шпацыр з белым парасонам на праспекце Пераможцаў. На волі яе сустрэла сям’я і сябры з кавай і тортам «Кавалак шчасця» ў руках.
Увечары 7 красавіка да Юлі ў Прылуцкую Слабаду, дзе яна жыве, прыехалі супрацоўнікі міліцыі. Разам з ёй у той жа дзень затрымалі маці і брата — іх асудзілі за непадпарадкаванне на 5 і 6 сутак адпаведна.
Сястру Лілію таксама забіралі ў РУУС на тры гадзіны, але пасля адпусцілі, бо ў яе ёсць непаўналетнія дзеці.
Усе 25 сутак Юлія Міхайлава правяла на Акрэсціна. Ад тых, хто раней выходзіў на волю з яе камеры, сястра Юліі Ліля загадзя ведала пра жудасныя ўмовы ў ЦІП. Камера была перапоўненая (здаралася, што ў двухмясцовай камеры знаходзілася адразу 10 чалавек), акно не адкрывалася, бракавала кіслароду. Лісты да асуджаных не даходзілі, кнігі і іншыя рэчы для баўлення часу адбіраліся.
Зняволеных маглі будзіць некалькі разоў за ноч, патрабуючы назваць сваё імя і прозвішча. На падлогу амаль кожную раніцу вылівалі ваду з хлоркай. У пэўны момант да дзяўчат падсялілі бяздомную з вошамі. Усё гэта пацвердзіла нам сама Юля:
— Наколькі мы зразумелі, з намі была тая ж бяздомная, якую падсялялі ў камеру да Вольгі Хіжынковай. Пры гэтым мыцца нас не вадзілі: падмываліся з бутэлек, якія ў нас таксама ўвесь час імкнуліся забраць супрацоўнікі ізалятара. А на шпацыр за 25 сутак я трапіла ўсяго адзін раз: на 24-я суткі.
Разам з Юляй у камеры апынулася, напрыклад, маці Сяргея «хлопотное дельце» Міронава. Дзяўчына кажа, што яна трымаецца малайцом.
Сярод іншых здзекаў, якія пералічвае Юля, — тое, што перадачы аддавалі з вялікай затрымкай, амаль у пару тыдняў. Мясцовая ж ежа часам была зусім жахлівай: напрыклад, у якасці супу давалі пустую грэчку з вадой.
— Каб нам сталі даваць нармальную ежу, мы нават пачалі галадоўку, — кажа суразмоўца.
На ўсе падобныя ўмовы дзяўчаты спрабавалі скардзіцца, прасілі паперу і асадкі, каб аформіць скаргу афіцыйна, але ім адмаўлялі. Заняцца гэтым плануюць ужо на свабодзе.
Раней Юлія Міхайлава ўжо чатыры разы адбывала адміністрацыйны арышт. Упершыню яе затрымалі 14 верасня 2020 года на жаночай акцыі каля Чырвонага касцёла — суд прысудзіў 12 сутак. Пасля яна пабыла на волі літаральна пару дзён і зноў была асуджаная на 15 сутак за шпацыр з кветкамі ў руках. Трэцяя адсідка здарылася ў лістападзе пасля наведвання Плошчы Перамен, куды беларусы прыйшлі ўшанаваць памяць забітага Рамана Бандарэнкі, а чацвёртая — зімой. 31 студзеня дзяўчына ішла па цэнтральным праспекце з лампадкай у руках і так «здабыла» сабе яшчэ 15 сутак у скарбонку.
Часткова пра сваё жыццё ў ізалятарах Юля расказала ў фільме «Сёстры пратэсту».
У суме, пачынаючы з верасня-2020, дзяўчына правяла за кратамі 82 дні.
«25 сутак у параўнанні з 15-цю цягнуліся, здаецца, вечнасць», — кажа Юля. Пры гэтым дзяўчына настроена вельмі пазітыўна: чарговае зняволенне яе дакладна не зламала.
Цяпер чытаюць
«Я ехала ад вайны і бамбёжак»: Яўгенія Чарняўская пра пераезд на Кіпр3
Каментары