Навукоўцы з Германіі і Вялікабрытаніі правялі даследаванне і высветлілі, што толькі адна краіна са 186 можа цалкам забяспечыць сябе ўсімі сямю асноўнымі групамі прадуктаў харчавання выключна за кошт уласнай вытворчасці. Вынікі апублікаваныя ў часопісе Nature Food.
Адзінай краінай, якая здольная цалкам пракарміць сваё насельніцтва нават у выпадку зрыву міжнародных паставак (як гэта было падчас пандэміі Covid-19), аказалася Гаяна — невялікая краіна ў Паўднёвай Амерыцы.
На другім і трэцім месцах — Кітай і В’етнам, якія могуць забяспечыць шэсць з сямі груп прадуктаў.
У той жа час шэсць краін не могуць самастойна забяспечваць сябе нават адной-адзінай групай прадуктаў — гэта Афганістан, Аб’яднаныя Арабскія Эміраты, Ірак, Макаа (спецыяльны адміністрацыйны раён Кітая), Катар і Емен.
Больш за траціну краін могуць забяспечыць сябе толькі дзвюма або менш групамі прадуктаў, прычым большая частка такіх краін знаходзіцца ў Афрыцы. Кожная сёмая краіна ў свеце дасягае самадастатковасці па пяці або больш групах, і гэтыя краіны пераважна размешчаныя ў Еўропе і Паўднёвай Амерыцы.
Навукоўцы таксама адзначылі, што прыкладна 65% краін могуць самастойна забяспечваць сябе жывёлагадоўчай прадукцыяй, але ў паўднёвай Афрыцы і Акіяніі назіраецца дэфіцыт малака. Еўрапейскія краіны, наадварот, цалкам забяспечваюць сябе малочнымі прадуктамі. Рыбай і морапрадуктамі забяспечваюць сябе толькі 25% краін, сярод якіх Расія і краіны Ціхаакіянскага рэгіёна. Аднак у 60% краін узровень забеспячэння морапрадуктамі не дасягае і паловы ад патрэбы.
Каля паловы краін забяспечваюць сябе крухмалістымі прадуктамі (45%), бабовымі, арэхамі і насеннем (46%), а таксама садавіной (47%). Толькі 24% краін дасягаюць самадастатковасці па агародніне. Высокі ўзровень забеспячэння гароднінай назіраецца ў краінах Міжземнамор’я і Цэнтральнай Азіі, а вось 91% краін Афрыкі на поўдзень ад Сахары маюць сур’ёзны дэфіцыт. Праблемы з агароднінай ёсць таксама ў Паўночнай Еўропе, Паўднёвай Амерыцы і краінах Карыбскага басейна.
Што да Беларусі, то, згодна з апублікаванымі картамі, яна цалкам забяспечвае сябе малочнымі і мяснымі прадуктамі, гароднінай і крухмалістымі прадуктамі харчавання (даследаванне праводзілася раней за сёлетнюю вясну). Найгоршая ж у нас сітуацыя з рыбай і бабовымі, арэхамі і насеннем.
На заканчэнне даследчыкі адзначылі, што ранейшыя работы ацэньвалі харчовую сітуацыю толькі па колькасці калорый, а цяпер улічваецца і збалансаванасць харчавання. Яны выкарыстоўвалі даныя ААН і дыету Livewell ад Сусветнага фонду дзікай прыроды (WWF), дзе прадукты падзеленыя на сем груп: садавіна, гародніна, бабовыя/арэхі/насенне, крухмалістыя прадукты, рыба/морапрадукты, мяса і малочныя прадукты.
Цяпер чытаюць
Агентка Кардаш выкарыстоўвала сэкс, каб збіраць інфармацыю пра каліноўцаў і завербаваць украінскага камандзіра. А куратару КДБ пісала пра яго: «Мой лох»3535
Каментары