Дзе цяпер пракурорка Касьянчык, якой пасля 2020-га адмовіліся здаваць кватэру?
Прызёрка рэспубліканскай алімпіяды па беларускай мове і выпускніца ліцэя БДУ стала рабіць сабе кар'еру на палітычных справах, калі ёй было 22 гады.
Па выніках яе абвінавачванняў два гады калоніі атрымаў Максім Паўлюшчык за надпіс «Не забудзем» на Пушкінскай. Яна ж судзіла журналістак «Белсата» Кацярыну Андрэеву і Дар’ю Чульцову за выкананне імі прафесійных абавязкаў — стрым, які яны вялі з разгону акцыі памяці забітага Рамана Бандарэнкі.
«Пераконваць кагосьці ў сваёй рацыі або заклікаць не рабіць высноў пра законнасць прыняцця кожнага канкрэтнага рашэння, толькі начытаўшыся артыкулаў у медыя, я не буду, як не буду пераконваць вас, што я засталася ўсё той жа самай Алінай, якую вы ведалі 6 гадоў таму і пра якую сказалі, на маю думку, дастаткова добрых слоў, за што вам шчыра ўдзячная», — пісала Касьянчык былым аднакласнікам у адным з чатаў.
Асобна варта згадаць гісторыю 33-гадовай Вольгі Сінялёвай — жанчына здавала пракурорцы кватэру, але пасля папрасіла вызваліць жылплошчу. Касьянчык не пярэчыла, сабрала манаткі і з'ехала.
А супраць Вольгі, маладой мамы ў дэкрэце, распачалі крымінальную справу паводле 190-га артыкула КК («Парушэнне раўнапраўя грамадзян») — маўляў, тым, яна дыскрымінавала Касьянчык, бо не хацела, каб у яе кватэры жыла пракурорка.
Па рашэнні суда Вользе Сінялёвай прысудзілі тады два гады хатняй хіміі.
Такая напорыстасць прынесла свае плады: Касьянчык атрымала павышэнне — з раённай пракуратуры Фрунзенскага раёна сталіцы яе перавялі ў пракуратуру па Мінску.
Яе адзначаў і Лукашэнка — у 2021-м маладая пракурорка атрымала падзяку за «шматгадовую плённую працу, узорнае выкананне службовых абавязкаў, высокія паказчыкі ў службовай дзейнасці па забеспячэнні законнасці, умацаванні правапарадку і барацьбе са злачыннасцю». У 2022-м Касьянчык чакала чарговая ўзнагарода.
Ужо працуючы ў гарадской пракуратуры, яна, напрыклад, падтрымлівала бок абвінавачвання ў судзе над экс-пракурорам Яўгенам Бабаком.
Патрабавала тэрмін і былому журналісту АНТ Дзмітрыю Семчанку. Тады, у маі 2023 года, Касьянчык згадвалася ў прапагандысцкіх медыя апошні раз.
Па інфармацыі «Кіберпартызан», па стане на 2024 год Аліна Касьянчык працягвала лічыцца супрацоўніцай Мінскай пракуратуры.
Цяпер чытаюць
«Яна не выглядала шчырай, была ў масцы». Паўлючэнка пра сустрэчу Калеснікавай з беларускімі журналістамі3
Каментары