U Brazilii vyjdzie pieršaja kniha, pierakładzienaja niepasredna ź biełaruskaj movy
Knihu biełaruskaj piśmieńnicy Hanny Jankuty «Kanstytucyja» vydaduć u pierakładzie na partuhalskuju movu. Vydaviectva z San-Paŭłu Toma Aí Um Poema ŭžo adkryła pieradzamovu. Jana budzie doŭžycca dva miesiacy, i ad jaje vynikaŭ zaležyć finalny nakład. Pierakład rychtuje Volha Franko, piša budzma.org.
«Pad kaniec hetaha ciažkaha i zmročnaha hoda ŭ mianie zdaryŭsia cud — Volha Franko rychtuje pierakład «Kanstytucyi» na brazilskuju partuhalskuju», — napisała Hanna Jankuta na svajoj staroncy ŭ fejsbuku.
Taksama piśmieńnica adznačyła, što rychtujecca vialikaja pradmova pra situacyju ŭ Biełarusi, pra jakuju ŭ Paŭdniovaj Amierycy amal ničoha nie viedajuć:
«… spadziajusia, kniha daść mahčymaść pašyrać viedy pra našu krainu. Pačuvajusia vielmi ščaślivaj — apošnija čatyry hady ja zajmałasia biełaruskimi historyjami z Paŭdniovaj Amieryki i Karybaŭ (vynik nieŭzabavie taksama musić pabačyć śviet), i toje, što «Kanstytucyja» źjavicca ŭ adnoj z krain rehijona, sapraŭdy vyhladaje jak cud.
Hałoŭnaja zasłuha ŭ padrychtoŭcy hetaj knihi i ŭ tym, što ŭ Brazilii ŭvohule viedajuć niešta pra Biełaruś, naležyć Voli Franko, jakaja aktyŭna pracuje na styku troch kultur — biełaruskaj, brazilskaj i ŭkrainskaj. Jana pierakładaje z partuhalskaj na biełaruskuju («Žyŭ-byŭ Tyran» Mašadu i inš.), z ukrainskaj na biełaruskuju (paetyčny zbornik Kryŭcova), z ukrainskaj na partuhalskuju (Kryŭcoŭ, Droń, Dereš) — i, viadoma, ź biełaruskaj na partuhalskuju.
U hetaj kambinacyi movaŭ jana pierakłała šerah asobnych tekstaŭ, adnak «Kanstytucyja» budzie jaje pieršaj knihaj, pierakładzienaj ź biełaruskaj na partuhalskuju. Bolš za toje, heta budzie pieršaja kniha ŭ Brazilii, pierakładzienaja naŭprost ź biełaruskaj movy. Dahetul, jak kaža Vola, biełaruskaja litaratura ŭ Brazilii pierakładałasia tolki z ruskaj (Śviatłana Aleksijevič) ci z polskaha pierakładu (Francišak Alachnovič)».
Knihu možna zakazać jak u papiarovym, tak i elektronnym varyjancie pa spasyłcy.
Ciapier čytajuć
U ramkach «novaj architektury biaśpieki» Maskva prapanuje vyvieści jadziernuju zbroju i «Arešnik» ź Biełarusi — infarmacyja pra pieramovy ŭ Abu-Dabi5252
Kamientary