FSB z pačatku hoda zabiła pry zatrymańni 14 čałaviek, jakich padazravali ŭ padrychtoŭcy dyviersij
Fiederalnaja słužba biaśpieki (FSB) adspravazdačyłasia pra raskryćcio «ahienturnaj hrupy ŭkrainskich śpiecsłužbaŭ, jakija rychtavali dyviersijna-terarystyčnyja akty» ŭ Rasii, piša Moscow Times.

Pa vynikach apieratyŭnych mierapryjemstvaŭ u Majkopie (Adyhieja), Cicharecku (Krasnadarski kraj), Kiźlary (Dahiestan) i Rastovie-na-Donie zatrymali čatyroch čałaviek.
«Jašče dvoje, jakija akazali ŭzbrojenaje supraciŭleńnie, byli likvidavanyja zvarotnym ahniom», — zajavili ŭ FSB.
Takim čynam, kolkaść padazravanych, zabitych supracoŭnikami śpiecsłužby padčas zatrymańnia z pačatku 2026 hoda, pavialičyłasia da 14, a z momantu ŭvarvańnia Rasii va Ukrainu — da 89. Padlik viadziecca z ulikam danych, raniej vydańniem «Važnyje istorii».
Pavodle viersii FSB, zatrymanyja i likvidavanyja ŭ listapadzie «ahienty» vajennaj raźviedki (HUR) i Słužby biaśpieki Ukrainy (SBU) rychtavali ataki na karabli ŭ Kaśpijskim mory, vajennyja aeradromy i abjekty infrastruktury.
Jak śćviardžajecca, dla hetaha z pačatku 2026 hoda im pieradali bolš za 700 kiłahramaŭ vybuchoŭki «zachodniaj vytvorčaści», nie mienš za 40 udarnych kvadrakoptaraŭ, šeść hidracykłaŭ, a taksama detali i abstalavańnie dla zborki bajavych bieśpiłotnikaŭ. Pavodle źviestak FSB, častku hruzaŭ pierapravili ŭ Rasiju z dapamohaj mieteazondaŭ i BPŁA, a hidracykły dastavili praz «trecija krainy».
U viedamstvie zajavili, što vodnyja matacykły płanavali pieraabstalavać u biezekipažnyja katery i asnaścić vybuchoŭkaj mahutnaściu da 60 kiłahramaŭ u traciłavym ekvivalencie, kab zatym atakavać karabli ŭ Kaśpijskim mory.
FPV-drony z kiravańniem praz vałakonna-aptyčny kabiel źbiralisia raźmiaścić u pryvatnych damach u Adyhiei i Krasnadarskim krai. Ich metami pavinny byli stać vajennyja aeradromy, krytyčnaja infrastruktura i abjekty žyćciezabieśpiačeńnia, dadali ŭ FSB.
Siłaviki acanili vydatki ŭkrainskich śpiecsłužbaŭ na padrychtoŭku apieracyi jak minimum u 2,5 młn dalaraŭ.
U FSB śćviardžajuć, što z boku SBU jaje kaardynavaŭ namieśnik kiraŭnika Centra śpiecyjalnych apieracyj «A» Mikałaj Uljanicki, a z boku HUR — hienierał-major Hieorhij Łordkipanidze.
Apošni — były paplečnik eks-prezidenta Hruzii Michaiła Saakašvili, jaki zajmaŭ pry im pasadu ministra ŭnutranych spraŭ. U 2015 hodzie jon atrymaŭ ukrainskaje hramadzianstva i ŭznačaliŭ milicyju Adeskaj vobłaści, a paśla pačatku vajny ŭ 2022 hodzie byŭ pryznačany namieśnikam dyrektara kontrvyviedki Ukrainy.
Kamientary