Niamieckija futbolnyja kłuby pačali abmiažoŭvać smartfony na stadyjonach
«Atrymlivajcie asałodu ad momantu».

Smartfony daŭno stali nieadjemnaj častkaj futbolnych matčaŭ. Zaŭziatary zdymajuć hały, robiać sełfi na trybunach i dzielacca videa ŭ sacyjalnych sietkach. Ale ŭ Hiermanii, jak paviedamlaje AFP, niekatoryja kłuby vyrašyli zmahacca z hetaj zvyčkaj.
Adnym ź ich stała dortmundskaja «Barusija», jakaja ŭ kastryčniku zapuściła prahramu zaachvočvańnia zaŭziataraŭ, hatovych adkłaści telefony padčas matčaŭ.
U kłubnym dadatku źjaviŭsia śpiecyjalny «režym zaŭziatara». Tyja, chto jaho ŭklučaje i nie karystajecca smartfonam padčas hulni, atrymlivajuć bały i mohuć vyjhrać pryzy — futbołki z aŭtohrafami hulcoŭ abo vaŭčary ŭ kłubnuju kramu.
Kiraŭnictva «Barusii» tłumačyć inicyjatyvu žadańniem zachavać asablivuju atmaśfieru svajho stadyjona «Viestfalenštadyjon», jaki źmiaščaje 82 tysiačy hledačoŭ.
Asablivy honar kłuba — znakamitaja «Žoŭtaja ściana», najbujniejšaja stajačaja trybuna ŭ Jeŭropie, raźličanaja na 25 tysiač čałaviek. Mienavita aktyŭnaja padtrymka zaŭziataraŭ robić chatnija matčy «Barusii» takimi vidoviščnymi.

Pavodle kiraŭnika kłuba Karstena Kramiera, pastajannyja paviedamleńni i videazdymka adciahvajuć zaŭziataraŭ ad taho, što adbyvajecca na poli.
Pry hetym «Barusija» nie vystupaje suprać technałohij, a tolki zaklikaje ludziej «hladzieć, atrymlivać asałodu i pieražyvać momant».
Jak adznačyŭ Kramier, inicyjatyva ŭžo atrymała vielmi stanoŭčyja vodhuki.
Abmiežavańni na vykarystańnie smartfonaŭ uviali i dva kłuby druhoj Bundeślihi — bierlinskaja «Hierta» i drezdenskaje «Dynama». Praŭda, u ich vypadku hałoŭnaj pryčynaj stała dziejnaść błohieraŭ, jakija zdymajuć videa na stadyjonach i zarablajuć na jaho raspaŭsiudžvańni.
Heta stvaraje prablemy nie tolki dla atmaśfiery matčaŭ, ale i dla ŭładalnikaŭ pravoŭ na tranślacyi. Tamu kłuby imknucca abmiežavać kamiercyjnuju zdymku, nie zaminajučy zvyčajnym zaŭziataram.
Prablema błohieraŭ, jakija zdymajuć spartyŭnyja mierapryjemstvy, chvaluje arhanizataraŭ i ŭ inšych krainach. Naprykład, paśla šmatlikich incydentaŭ na adkrytym čempijanacie ZŠA pa tenisie ŭ 2026 hodzie arhanizatary Uimbłdona vyrašyli z 2027 hoda zabaranić prysutnaść takich stvaralnikaŭ kantentu.
U Hiermanii ž padobnyja inicyjatyvy znachodziać asablivaje razumieńnie praz tradycyjna mocnyja pazicyi futbolnych zaŭziataraŭ. Miascovyja praviły kiravańnia kłubami zabiaśpiečvajuć ich členam vyrašalny ŭpłyŭ na pryniaćcie rašeńniaŭ, a zachavańnie stadyjonnaj kultury zastajecca adnym z pryjarytetaŭ.
Zrešty, nie ŭsie niamieckija kłuby źbirajucca abmiažoŭvać smartfony. U miunchienskaj «Bavaryi» da inicyjatyvy hałoŭnaha kankurenta pastavilisia z humaram.
«U «Bavaryi» futboł nastolki zachaplalny, što nam nie treba zabaraniać telefony», — žartuje člen praŭleńnia kłuba Ruvien Kaśpier.
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał
Kamientary