«Łukašenka viedaje, što zadumvaje Pucin, i vielmi hetaha baicca». Čały pra pahrozu novaj vajny
Siarhiej Čały źviartaje ŭvahu na śpiešnuju vajskovuju padrychtoŭku ŭ Biełarusi. Łukašenka sprabuje strymać Pucina, ale ŭžo nie moža zabłakavać rašeńni Maskvy, skazaŭ Čały ŭ intervju «Radyjo Svaboda».
U intervju prahramie «Kanapa» Radyjo Svaboda Čały patłumačyŭ, čamu ličyć asabliva niebiaśpiečnym pieryjad z traŭnia da vieraśnia 2027 hodu i jak Łukašenka sprabuje paŭpłyvać na rasiejskaha kiraŭnika.
Na dumku Siarhieja Čałaha, apošnija pavodziny Łukašenki śviedčać pra toje, što toj razumieje niebiaśpieku situacyi, u jakoj apynuŭsia.
«Jon demanstruje dźvie rečy. Heta žyviolny strach pierad nabližeńniem krachu. A z druhoha boku, adnačasova, jak heta zaŭsiody byvaje, — momanty fatalizmu. Voś hetyja frazy pra toje, što ja ž zrabiŭ usio, što moh. Daj Boh, nie budzie vajny ci jašče čaho-niebudź. Heta sproba apraŭdacca pierad historyjaj», — kaža Čały.
Analityk pierakanany, što Łukašenka viedaje pra mahčymyja namiery Pucina i vielmi ich baicca. Pry hetym Čały źviartaje ŭvahu na prykmiety śpiešnaj vajskovaj padrychtoŭki ŭ Biełarusi.
«Moj bazavy prahnoz — heta vielmi vialikaja ryzyka. Kali imaviernaść niejkaj pahrozy pačynaje pieravyšać umoŭnyja 30%, heta aznačaje, što jaje ŭžo treba razhladać nie jak niešta, što, moža, abminie, a jak pracoŭny varyjant, da jakoha treba rychtavacca. Tamu što nastupstvy niepadrychtavanaści vielmi doraha kaštujuć. Źviarni ŭvahu, jak šmat źjaŭlajecca paćvierdžańniaŭ taho, što jany śpiašajucca. Łukašenka dvojčy jeździŭ na palihony. Abodva razy jon raskazvaŭ pra dyscyplinu. Tam jon kazaŭ, što buduć kirkaj dziaŭbci miorzłuju ziamlu, žyć u namiotach, što jamu treba šeść umacavanych rajonaŭ. Treba paśpieć, pakul rastanie. Navošta? Jeść niejki časavy haryzont. Ja b umoŭna nazvaŭ jaho: travień nastupnaha hodu — vierasień nastupnaha hodu», — kaža Čały.
Adnoj z najbolš niebiaśpiečnych dla Biełarusi akaličnaściaŭ analityk ličyć raźmiaščeńnie rasiejskaha rakietnaha kompleksu «Arešnik».
«U jaho byŭ adzin z takich momantaŭ, kali jon adnačasova spałochaŭsia, zapanikavaŭ i prademanstravaŭ fatalizm. Kali jon zrazumieŭ, što raźmiaščeńnie «Arešnikaŭ» na biełaruskaj terytoryi maje sens tolki jak jadziernaja zbroja. Tamu što sama pa sabie jana niedakładnaja. Ale vyprabavańnie było, heta ćvierdapaliŭnaja rakieta, staraja pravieranaja technałohija, jana lotaje. Pucin upeŭnieny, što jana lotaje i traplaje pryblizna kudy treba. Z punktu hledžańnia teatru vajennych dziejańniaŭ heta aznačaje, što hetyja abjekty na biełaruskaj terytoryi buduć padaŭlacca ŭ pieršuju čarhu», — miarkuje analityk.
Čały taksama źviartaje ŭvahu na scenar vajskovych vučeńniaŭ, jaki, pavodle jaho, praduhledžvaŭ abaronu pa linii Horadnia — Skidziel — Słonim.
Na pytańnie, ci nie moža heta być prosta demanstracyjaj dla publiki, Čały adkazaŭ: «Zanadta doraha dla takoj demanstracyi».
«Jon ciapier zaklinalnik Pucina»
Asobna Čały patłumačyŭ, navošta Łukašenka tak časta sustrakajecca z Pucinym i pra što jany mohuć razmaŭlać hadzinami.
«Jon ciapier zaklinalnik Pucina. Viedaješ, jak byvajuć zaklinalniki źmiej ci niebiaśpiečnych žyviołaŭ. Maŭlaŭ, spakojna, spakojna. Jon ciapier voś hetym zajmajecca. A jakija ŭ jaho inšyja varyjanty? Sens u tym, što jon kaža: «Nu vy ž trymajecie svajo słova, praŭda? Vy ž nie budziecie hetuju našu hrupoŭku niedzie vykarystoŭvać, praŭda? Vy ž čałaviek słova?» U nadziei, što toj jamu chacia b kiŭnie ci niešta takoje», — kaža Čały.
Pry hetym analityk nie ličyć, što Łukašenka maje mahčymaść zabłakavać rašeńni Maskvy.
Na pytańnie, ci budzie Pucin raicca ź im, kali vyrašyć vykarystać Biełaruś u novym vajennym scenary, Čały adkazaŭ admoŭna.
«Nie. A jaki ŭ Łukašenki tut vybar? Voś ujavi sabie, jon skaža: «A ja suprać». A jamu skažuć: «Nu, čuvak, u hetaj situacyi ty zdradnik sajuznaj dziaržavy»».
Čały ličyć, što Łukašenka straciŭ mahčymaść samastojna supraćstajać Maskvie paśla padziej 2020—2021 hadoŭ.
«Ja b skazaŭ, što aryšt vahnieraŭcaŭ u 2020 hodzie byŭ apošnim empiryčnym faktam, kali jon jašče moh demanstravać niejkuju svaju subjektnaść u dačynieńni da rasiejcaŭ. Ciapier takoje całkam niemahčyma. Pryblizna z 2020—2021 hadoŭ».
Na dumku Čałaha, Łukašenka razumieje hetuju zaležnaść i sprabuje nie dapuścić raźvićcia padziej, jakija mohuć pastavić pad pahrozu jahonaje ŭłasnaje stanovišča.
Ciapier čytajuć
Što znajšli ŭ viaźnicy Kreŭskaha zamka, dzie ŭ 1382‑m zadušyli Kiejstuta? Jana była pachavanaja pad zavałami paśla šturmu Śvidryhajły amal 600 hadoŭ55
Kamientary