«Kisłarod nam viarnuli, ale my nie možam udychnuć na poŭnyja hrudzi». Polski biznes acaniŭ hod paśla adkryćcia dvuch pierachodaŭ na miažy ź Biełaruśsiu
Za hod paśla adkryćcia pamiežnych pierachodaŭ «Kuźnica» i «Babroŭniki» vyručka polskich pradprymalnikaŭ ad šopinh-turyzmu z boku Biełarusi vyrasła tolki na 10%. Takija danyja pryviała padčas pres-kanfierencyi kiraŭnica asacyjacyi polskich pradprymalnikaŭ «Abjadnany Uschod» Evielina Hryhatovič-Šumoŭska, piša Most.

Pavodle słoŭ Evieliny Hryhatovič-Šumoŭskaj, polski biźnies raźličvaŭ na bolš prykmietnaje ažyŭleńnie paśla adnaŭleńnia ruchu praź miažu ź Biełaruśsiu.
«Hod tamu ja kazała, što pryhraničny ruch dla Padlaskaha vajavodstva — jak kisłarod. Na žal, kisłarod byccam by viarnuli, ale naša vajavodstva dahetul nie moža ŭdychnuć na poŭnyja hrudzi», — skazała Hryhatovič-Šumoŭskaja.
Rost dachodaŭ pryhraničnaha biźniesu, pavodle jaje acenak, strymlivajecca strohimi vizavymi praviłami i sankcyjami, jakija ŭdaryli pa zvyčajnych hramadzianach Biełarusi. Adnaŭleńnie raniejšych ekanamičnych suviaziaŭ, pavodle acenki kiraŭnicy «Abjadnanaha Uschodu», zojmie hady.
Častkova polskija pradprymalniki, jakija pracujuć u pryhraničnym rehijonie, kampiensavali niedabor za košt unutranaha turyzmu. Naprykład, haściničnaja halina pryciahvała turystaŭ ź inšych rehijonaŭ Polščy.
«Letnija kanikuły i vierasień pakazali, što palaki nanova zakachalisia ŭ naš rehijon, što dazvoliła kampanijam spracavać hod z vydatnym vynikam», — skazała Hryhatovič-Šumoŭskaja.
Jana źviazała heta sa źnižeńniem niehatyŭnaha infarmacyjnaha fonu vakoł polska-biełaruskaj miažy i paśpiachovaj rekłamnaj kampanijaj Padlaskaj rehijanalnaj turystyčnaj arhanizacyi.
Kamientary