Amierykanski sudmiedekśpiert: Džefry Epštejn, imavierna, byŭ zabity, a nie pakončyŭ z saboj
Amierykanski sudova-miedycynski ekśpiert Majkł Fryman zajaviŭ Bi-bi-si, što finansist Džefry Epštejn, abvinavačany ŭ sieksualnaj ekspłuatacyi niepaŭnaletnich i znojdzieny miortvym u turemnaj kamiery ŭ 2019 hodzie, byŭ, chutčej za ŭsio, zabity, a nie skončyŭ žyćcio samahubstvam.

Prafiesar Fryman sam nie ahladaŭ cieła Epštejna, ale vyvučyŭ sudovyja dakumienty ab jaho śmierci. Na padstavie ŭbačanaha jon skazaŭ u teleefiry Bi-bi-si, što Epštejn byŭ zadušany — chutčej za ŭsio, udaŭkaj zzadu, paviedamlaje Bi-bi-si.
Pry hetym sudmiedekśpiert, jaki siem hadoŭ tamu pravodziŭ uskryćcio cieła Epštejna, daŭ aficyjnaje zaklučeńnie, što charaktar paškodžańniaŭ cieła adpaviadaje samahubstvu. Jon taksama pryjšoŭ da vysnovy, što na ciele nie było ranieńniaŭ, jakija zvyčajna atrymlivaje toj, chto adbivajecca ad zabojcy.
66‑hadovy Džefry Epštejn, jaki siabravaŭ z mnostvam palitykaŭ i bujnych biźniesmienaŭ z ZŠA, Brytanii i inšych krain, uklučajučy Donalda Trampa, byŭ znojdzieny miortvym 10 žniŭnia 2019 hoda ŭ kamiery ŭ ńju-jorkskaj turmie. Tam jon siadzieŭ u čakańni suda pa abvinavačańni ŭ sieksualnaj ekspłuatacyi dziaŭčat.
Tahačasny hałoŭny sudmiedekśpiert Ńju-Jorka doktar Barbara Sempsan, jakaja zrabiła vysnovu, što śmierć Epštejna była samahubstvam, raniej zajaŭlała: «Ja ćviorda staju na našym zaklučeńni adnosna pryčyny i charaktaru śmierci mistera Epštejna. Pryčyna — paviešańnie, charaktar — samahubstva».
Majkł Fryman u svajoj karjery pracavaŭ sudmiedekśpiertam pry hienieralnych prakurorach roznych štataŭ ZŠA i vyśviatlaŭ pryčyny śmierci pad aryštam abo ŭ źniavoleńni, u tym liku — pryčyny śmierci Džordža Fłoida ŭ 2020 hodzie ŭ Minieapalisie.
Jon atrymaŭ dakumienty miedycynskaha ahladu cieła Epštejna ad jahonaha brata, Marka Epštejna, vyvučaŭ ich na praciahu hoda, a ŭ hety paniadziełak vystupiŭ z dakładam ab vynikach va Univiersiteckim kaledžy Łondana. Zatym jon raskazaŭ pra svaje vysnovy ŭ efiry Bi-bi-si.
Što mienavita kaža Fryman
Sam Mark Epštejn upeŭnieny, što jaho brat byŭ zabity.
Prafiesar Fryman zapeŭnivaje, što analizavaŭ dakumienty niepraduziata i što Mark Epštejn ničoha jamu nie płaciŭ. Jaho daśledavańnie nie recenzavałasia inšymi ekśpiertami.
Fryman raskazaŭ Bi-bi-si, što, na jaho dumku, dokazy pakazvajuć na toje, što na Epštejna napali. Siarod hetych dokazaŭ — mocny kryvapadciok na levym plačy i paškodžańni, jakija mohuć śviedčyć ab udary ŭ tvar.
Na dumku prafiesara Frymana, vyniki ahladu cieła ź vialikaj vierahodnaściu pakazvajuć na zadušvańnie piatloj, impravizavanaj udaŭkaj, i zatym padviešvańnie cieła na narach na hetaj ža piatli.
Jon skazaŭ, što nad śledam ad piatli na šyi Epštejna možna było razhledzieć ślady ad paznohciaŭ.
«Heta adpaviadaje karcinie zadušvańnia, asabliva zzadu, i sprobaŭ achviary źniać piatlu z šyi», — patłumačyŭ sudmiedekśpiert.
«Paškodžańni i toje, u jakim stanoviščy było znojdziena cieła, nie adpaviadajuć adno adnamu. Tak što zastajecca tolki adno tłumačeńnie: śmierć była vynikam zabojstva», — zajaviŭ prafiesar Fryman.
Sudmiedekśpiert, jaki pravodziŭ uskryćcio cieła Epštejna, paviedamlaŭ Miniustu ZŠA, što traŭmy Epštejna bolš adpaviadali samahubstvu praz paviešańnie, čym zabojstvu šlacham zadušvańnia. Jon taksama zajaviŭ ab adsutnaści śviedčańniaŭ traŭmaŭ, jakija mahli źjavicca ŭ momant, kali achviara abaraniałasia (takija paškodžańni znachodziać na achviarach zadušvańnia).
Akramia taho, pavodle słoŭ Frymana, u vypadku sa śmierciu praz paviešańnie ŭ turmie jon čakaŭ by ad śledstva fatahrafii cieła, zroblenaj da taho, jak jaho vyciahnuli ź piatli.
Ministerstva justycyi ZŠA pa vynikach rasśledavańnia abstavin śmierci Epštejna zajaviła, što achoŭnik, jaki vyjaviŭ Epštejna ŭ piatli, adrazu ž paklikaŭ kalehu, i jany ŭdvaich pakłali cieła na padłohu i pasprabavali zrabić štučnaje dychańnie.
Akramia taho, Miniust zajaŭlaŭ, što za miesiac da śmierci Epštejn byŭ nienadoŭha źmieščany pad nazirańnie ŭ suviazi z aściarohami, što jon moža ŭčynić samahubstva.
Na pytańnie, chto moh zabić Epštejna, doktar Fryman adkazaŭ: «Paniaćcia nie maju. Na hety kont u mianie niama mierkavańnia. Heta zusim nie ŭvachodziła ŭ mety majho rasśledavańnia».
U adkaz na pytańnie, ci nielha ličyć, što jaho pohlady miažujuć z teoryjami zmovy, ekśpiert zajaviŭ: «Na ščaście, ja mahu skazać: nie viercie mnie na słova, niachaj kožny vyvučyć najaŭnyja źviestki samastojna».
«Kali vy ličycie, što ja raspaŭsiudžvaju teoryi zmovy, tamu što hladžu na niešta padobnaje na zadušvańnie i nazyvaju heta zadušvańniem, a nie paviešańniem, pakažycie mnie, dzie ja pamylajusia, — praciahnuŭ ekśpiert. — Ja całkam da hetaha adkryty. Ja ž navukoviec, ja zaŭsiody rady pačuć abhruntavanyja mierkavańni inšych ludziej».
Džefry Epštejn upieršyniu byŭ abvinavačany va ŭciahvańni niepaŭnaletnich u prastytucyju ŭ 2008 hodzie, ale tady jon, dziakujučy ŭhodzie sa śledstvam, atrymaŭ usiaho 13 miesiacaŭ turmy.
Praz 11 hadoŭ Epštejnu vysunuli abvinavačańnie ŭ arhanizacyi cełaj sistemy sieksualnaj ekspłuatacyi niepaŭnaletnich dziaŭčat, i pa hetym abvinavačańni jamu pahražali ŭžo dziesiacihodździ turmy.
-
U Rasii zajavili, što ŭdzieł Jeŭropy ŭ pieramovach pa Ukrainie ź imi nie ŭzhadniaŭsia. Choć Uitkaf i Kušnier śćviardžali advarotnaje
-
Le Pien: Francyja pry mnie nie budzie akazvać Ukrainie novaj finansavaj dapamohi, ale papiarednija abaviazacielstvy vykanaje
-
Ursuła fon der Lajen pryviała Biełaruś jak prykład, da čaho pryvodzić admova ad jeŭraintehracyi
Ciapier čytajuć
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał
Kamientary