Serca — amal adziny orhan, jaki nie chvareje na rak. Navukoŭcy pačynajuć razumieć čamu
Rakavyja puchliny mohuć uźnikać amal u lubym orhanie, ale ŭ sercy heta zdarajecca nadzvyčaj redka. Navukoŭcy doŭha šukali tłumačeńnie hetaj asablivaści i ciapier znajšli padkazku.

Pieršasnyja puchliny serca, jakija ŭźnikajuć niepasredna ŭ jaho tkankach, sustrakajucca nadzvyčaj redka. Pry hetym bolšaść ź ich dabrajakasnyja, choć i jany mohuć pahražać žyćciu, kali pieraškadžajuć ruchu kryvi.
Adnu z pryčyn takoj ustojlivaści serca da raku miedyki viedajuć daŭno. Kletki sardečnaj myšcy amal pierastajuć dzialicca nieŭzabavie paśla naradžeńnia čałavieka. A čym radziej kletki dzielacca, tym mienš imaviernaść pamyłak u DNK, jakija mohuć pryvieści da ŭźniknieńnia raku.
Adnak, jak piša Daily Mail, navukoŭcy z Univiersiteta Tryjesta ŭ Italii vyjavili jašče adzin mahčymy miechanizm abarony ad raku, źviazany z samoj pracaj serca.
Jak viadoma, serca skaračajecca kala 100 tysiač razoŭ za sutki. Pry hetym jaho tkanki pastajanna zaznajuć miechaničnyja nahruzki. Daśledčyki vyrašyli pravieryć, ci mohuć hetyja nahruzki pieraškadžać rostu rakavych kletak.
Dla hetaha jany praviali ekśpierymienty na myšach. Vyjaviłasia, što ŭ sercach z panižanaj miechaničnaj nahruzkaj rakavyja kletki aktyŭna razmnažalisia. A ŭ sercach, jakija pracavali sa zvyčajnaj nahruzkaj, ich rost strymlivaŭsia.
Navukoŭcy vyśvietlili, što sprava nie tolki ŭ fizičnym ściskańni rakavych kletak. Važnuju rolu adyhryvaje białok niespryn-2 (Nesprin-2), jaki dapamahaje kletkam usprymać miechaničnyja nahruzki i pieradaje adpaviednyja sihnały da ich jadra. Heta zapuskaje źmieny, jakija strymlivajuć dzialeńnie rakavych kletak.
Kab pravieryć rolu hetaha białku, daśledčyki štučna pryhłušyli jaho vypracoŭku. Paśla hetaha rakavyja kletki pačali aktyŭna razmnažacca navat u sercach, jakija pracavali sa zvyčajnaj nahruzkaj.

Ci dapamoža heta ŭ lačeńni raku?
Ciapier italjanskija navukoŭcy vyvučajuć mahčymaść stvareńnia pryłady, jakaja b uździejničała na puchliny miechaničnaj nahruzkaj. Taki padychod u budučyni možna było b pasprabavać prymianiać, naprykład, pry raku skury ci małočnaj załozy.
Padobnyja daśledavańni pravodziać i va Univiersitecie Hołueja ŭ Irłandyi. Tam vyśvietlili, što źniešni cisk moža pieraškadžać rakavym kletkam pavialičvacca ŭ pamierach. Pierš čym padzialicca, kletka pavinna nazapasić nieabchodnyja rečyvy i pahłynuć vadu. Ale pad mocnym ciskam navakolnych tkanak hety praces uskładniajecca, i dzialeńnie spyniajecca.
Adnak ściskańnie puchlin moža być i niebiaśpiečnym. Daśledčyki papiaredžvajuć, što ŭ niekatorych vypadkach cisk zdolny, naadvarot, spryjać raspaŭsiudžvańniu rakavych kletak pa arhaniźmie.
Tamu navukoŭcy razhladajuć i inšy šlach — raspracoŭku lekaŭ, jakija ŭździejničali b na białki nakštałt niesprynu-2 i rabili puchliny bolš adčuvalnymi da miechaničnych nahruzak.
Pakul hetyja padychody zastajucca ekśpierymientalnymi. Ale adkryćcio pakazvaje, što na raźvićcio raku ŭpłyvajuć nie tolki bijachimičnyja pracesy, ale i fizičnyja siły, jakija dziejničajuć na kletki.
Ciapier čytajuć
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał
Kamientary