Paŭła Muraviejku, jaki adpracavaŭ namieśnikam u Administracyi Łukašenki tolki paŭtara miesiaca, pieraviali ŭ kiraŭniki Viciebščyny
Muraviejka ŭsiu karjeru zrabiŭ u vojsku.

Alaksandr Łukašenka naznačyŭ Paŭła Muraviejku staršynioj Viciebskaha abłasnoha vykanaŭčaha kamiteta.
Da hetaha času Muraviejka zajmaŭ pasadu namieśnika kiraŭnika łukašenkaŭskaj Administracyi. A da hetaha kiravaŭ Hienieralnym štabam Uzbrojenych Sił.
«Ja chacieŭ by vas bačyć hubiernataram u Viciebskaj vobłaści. Čamu z usich kandydatur ja vam prapanuju hetu rabotu: vy — čałaviek sistemny, z vajennym charaktaram, jaki pryvyk stavić zadačy i patrabavać vykanańnia», — skazaŭ Łukašenka.
Jon raskazaŭ, što pytaŭ pra Muraviejku, kali taho pryznačyli ŭ Hienieralny štab, i surazmoŭcy byli pra jaho dobraha mierkavańnia. Tamu Łukašenka, pavodle jaho słoŭ, zrabiŭ vysnovu, što Muraviejka pavinien spravicca z hetaj pasadaj.
«U Viciebskaj vobłaści biada — dyscyplina. Treba ŭvodzić vajskovuju dyscyplinu ŭ płanie vykanańnia technałahičnych rehłamientaŭ», — panarakaŭ Łukašenka.
55‑hadovy Pavieł Muraviejka naradziŭsia ŭ Marjinaj Horcy 26 vieraśnia 1971 hoda. U 1992‑m skončyŭ Minskaje vyšejšaje vajskova-palityčnaje ahulnavajskovaje vučylišča. Paśla Muraviejka pastupiŭ u minskuju Vajskovuju akademiju, jakuju skončyŭ u 2001-m. Praź niekalki hadoŭ vučyŭsia ŭ Rasii — u Akademii Hienštaba RF.
Łukašenka pryznačyŭ Paŭła Muraviejku namieśnikam kiraŭnika svajoj Administracyi ŭ kancy vieraśnia. Raniej toj zajmaŭ pasadu načalnika Hienieralnaha štaba Uzbrojenych sił — pieršaha namieśnika ministra abarony.
Pryznačeńnie Muraviejki ŭ Administracyju — heta była niečakanaja kambinacyja Łukašenki, sens jakoj byŭ niezrazumieły. Adyjozny hienierał Pavieł Muraviejka byŭ pryznačany na śpiecyjalna pad jaho stvoranuju pazicyju, u abychod kiraŭnika Administracyi, Dźmitryja Krutoha.
Takaja rakiroŭka stała siurpryzam dla ŭsich, bo hienierał-major Pavieł Muraviejka maje reputacyju ćvierdałobaha navat pa mierkach ciapierašniaj siłavoj viarchoŭki.
Ciapier — novaje niečakanaje pryznačeńnie ŭ prablemnuju Viciebskuju vobłaść.
20 kastryčnika Alaksandr Łukašenka padpisaŭ ukaz ab vyzvaleńni z pasady staršyni Viciebskaha abłvykankama Alaksandra Rahožnika. Pryčynaj nazvali chvarobu 50‑hadovaha Rahožnika. Chacia jašče 17 kastryčnika toj asabista braŭ udzieł u abłasnych «Dažynkach» u Miorach i, prynamsi vonkava, chvorym nie vyhladaŭ.
Da Rahožnika vobłaść čatyry hady ŭznačalvaŭ Alaksandr Subocin. Łukašenka rehularna patrabavaŭ ad jaho navieści paradak i dyscyplinu. Na vialikaj naradzie ŭ Viciebsku ŭ kastryčniku 2025 hoda jon nazvaŭ situacyju ŭ vobłaści «najžachliviejšaj».
U studzieni 2026 hoda Subocina źniali.
Ciapier čytajuć
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał
Kamientary