Volha Hapiejeva atrymała niamieckuju litaraturnuju premiju imia bratoŭ Hrym
Uračystaja cyrymonija ŭznaharodžańnia adbyłasia ŭviečary 16 listapada 2026 hoda ŭ niamieckim horadzie Chanaŭ, piša Radyjo Svaboda.

Biełaruskaja piśmieńnica Volha Hapiejeva stała łaŭreatkaj Premii bratoŭ Hrym horada Chanaŭ 2026 hoda (Brüder-Grimm-Preis der Stadt Hanau).
Premija prysudžana za knihu ese na niamieckaj movie Wörterbuch einer Nomadin («Słoŭnik vandroŭnicy»), u jakoj aŭtarka daśleduje ŭzajemasuviazi pamiž movaj, domam, identyčnaściu i pačućciom prynaležnaści.
Žury adznačyła, što z elemientaŭ roznych moŭ Volha Hapiejeva stvaraje vobraz «doma movy», jaki dapamahaje zachoŭvać aporu ŭ pastajannym ruchu i adarvanaści ad radzimy. Pryzavy fond premii składaje 10 000 jeŭra.
Cyrymonija prajšła ŭviečary 16 listapada ŭ čytackaj kaviarni Kulturnaha forumu Chanaŭ (Kulturforum Hanau), dzie ŭznaharodu ŭručyŭ obier-burhamistr horada Maksimilijan Biry.
Kniha vyjšła ŭ aŭstryjskim vydaviectvie Literaturverlag Droschl u lutym 2026 hoda.
«Volha Hapiejeva pradstaŭlaje «słoŭnik» svaich hadoŭ žyćcia ŭ jakaści vandroŭnicy pamiž Biełaruśsiu, Hiermanijaj, Krytam i Japonijaj. Jon adnačasova paetyčny, asabisty i palityčny.
Kniha Hapiejevaj — heta paetyčny rozdum pra movu, identyčnaść i pačućcio prynaležnaści. Aŭtarka daśleduje temy doma i čužyny, hiendaru i patryjarchatu, a taksama mahčymaść być «čałaviekam» pa-za miežami tych jarłykoŭ, jakija nam naviazvajuć», — piša pra knihu vydaviectva.
Litaraturnaja premija bratoŭ Hrym horada Chanaŭ zasnavanaja na radzimie słavutych kazačnikaŭ Jakaba i Vilhielma Hrymaŭ. Jana ŭručajecca raz na dva ci try hady za vydatnyja prazaičnyja, paetyčnyja abo dramaturhičnyja tvory, napisanyja na niamieckaj movie.
Dla Volhi Hapiejevaj heta ŭžo nie pieršaja bujnaja niamieckamoŭnaja ŭznaharoda: u 2022 hodzie jana atrymała prestyžnuju premiju Wortmeldungen.
Ciapier čytajuć
«Dajcie kruhłuju sumu i hod — budzie vam luby šedeŭr Mikiełandžeła!» Ułady zapatrabavali pierarabić «Bychaŭskuju madonnu». Aŭtar padtočvaje jaje bałharkaj
Kamientary